Almaty ákimi Darhan Satybaldy Koreıa Respýblıkasynyń Kónsan-Namdo provınsıasynyń gýbernatory Pak Van Sýmen resmı kezdesý ótkizdi. Kezdesý barysynda taraptar úsh negizgi memorandýmǵa qol qoıdy. Atap aıtqanda, Almaty men Kónsan-Namdo arasyndaǵy seriktestik pen tájirıbe almasý, jedel saty salasyn birlese damytý jáne sheteldik stýdentterdi tartý máseleleri boıynsha ýaǵdalastyq jasaldy. Bul qujattar iskerlik qarym-qatynasty bekemdeýge, joǵary tehnologıa men bilim berý salasynda ortaq jobalardy júzege asyrýǵa jáne tájirıbe almasýǵa jol ashady.
Darhan Satybaldy bilim berý baǵytyndaǵy áriptestiktiń erekshe mańyzy bar ekenin atap ótti. Onyń aıtýynsha, Ońtústik Koreıa Azıa-Tynyq muhıty óńirinde bilim berý salasynyń kóshbasshysy sanalady. Byltyr sheteldik stýdentter úshin eń qolaıly memleketterdiń biri dep tanylǵan.
«Biz bilim salasyndaǵy baılanysty nyǵaıtýǵa múddelimiz. Sizdiń delegasıańyzben birge Chanvon ýnıversıteti men Koreıa jedel saty ındýstrıasy ýnıversıtetiniń rektorlarynyń kelýi osy baǵyttyń mańyzyn aıǵaqtaıdy. Ásirese, ınjenerlik-tehnıkalyq jáne IT salalary biz úshin asa mańyzdy. Bul mamandyqtar Almaty men Qazaqstan ekonomıkasyn damytýda strategıalyq mánge ıe», – dedi qala basshysy.
Ákim sondaı-aq, Almaty men Ońtústik Koreıa arasyndaǵy baılanystyń qarqyndy damyp kele jatqanyn aıtty. 2025 jyldyń alǵashqy jartysynda shaharǵa Koreıa Respýblıkasynan 10 myńnan astam týrıs kelgen.
Óz kezeginde gýbernator Pak Van Sý Kónsan-Namdo provınsıasynyń Almatymen ózara yntymaqtastyqty keńeıtýge nıetti ekenin jetkizdi. Ásirese, jedel saty óndirisin órkendetý jáne erkin ekonomıkalyq aımaq aıasynda birlesken jobalardy júzege asyrýǵa basymdyq beriletinin atady. Ol qol qoıylǵan memorandýmdar Koreıa men Qazaqstan arasyndaǵy uzaq merzimdi seriktestiktiń berik irgetasyna aınalyp, jańa tehnologıa almasýǵa, ınvestısıa tartýǵa jáne ınovasıalyq bastamalardy júzege asyrýǵa serpin beretinine senim bildirdi.