Murat QUSAIYNOV, «Dos-Muqasan» tobynyń ánshisi, QR Eńbek sińirgen qaıratkeri:
– Kóńil-kúıim tamasha! Tabıǵat ta búgin bizge qoldaý kórsetip, kún jarqyrap shyǵyp tur. Men bul kúndi uzaq kúttim. İshteı bir saıası ózgeris bolý kerek sıaqty bolyp turatyn. Mine, qazir ǵana №262 saılaý ýchaskesine otbasymmen kelip, daýys berdik. Durys tańdaý jasadym. Kimge daýys bergenim ózime belgili.
Jalpy, men elimizde oń ózgerister bolǵanyn qalaımyn. Elimiz ál-aýqatty, baqýatty el bolsa deımin. Táńirdiń bizge bergen baılyǵy ózimizdiń halqymyzǵa, bolashaǵymyzǵa buıyrsa eken. Sondyqtan búgingi saılaýdan úlken úmit kútemin. Osyndaıda aýzy dýaly bir azamattyń: «Bizdiń Qazaqstannan artyq elimiz de, jerimiz de joq. Basty baılyǵymyz - Qazaqstan», - dep aıtqan sózi oıyma oralyp tur. Sondyqtan Qazaqstannyń árbir azamaty óz eliniń baıandy, turaqty bolýyna úlesin qosýy kerek. Jastarymyz, nemerelerimiz Ádiletti Qazaqstanda ómir súrse degen armanym bar. Qazirgideı geosaıası jaǵdaı ýshyǵyp turǵan kezeńde bizdiń elimizde, shúkirshilik, tynyshtyq bolyp tur. Jalpy, qazaq halqy qonaqjaı, darhan peıildi ǵoı. Osynaý tynysh, beıbit ómir sol peıilinen, qasıetinen shyǵar deımin. Árbir adam bolashaqtan úmit kútedi. Bir kúnnen bir kún jaqsara túsedi. Saılaýdan keıingi kúnimiz budan da jaqsy bolsa deımin.