Jasandy ıntellektiń baqylaýsyz damýy AQSH mektepterinde býllıngti kúsheıtti.
Onyń ishinde jasandy zerdeniń kómegimen oqýshy qyzdardyń jalańash sýretin jasap, áleýmettik jeli arqyly taratýdyń birneshe faktisi tirkeldi. Arnaıy zań bekitpese, mundaı jaǵdaı kóbeıe túspek, - deıdi mamandar.
Eldiń jaǵasyn ustatqan oqıǵanyń biri Nú Jersı shtatyndaǵy myna mektepte bolǵan. 14 jasar birneshe qyzdyń jalańash sýretteri snapchat áleýmettik jelisi arqyly tarap ketedi. Tekseris jalǵan pornografıalyq sýretti synyptas bozbalanyń jasandy ıntellekt qosymshasyn paıdalanyp jasaǵanyn anyqtaıdy.
«Biz buǵan qatty ashýlandyq. Qyzdardyń kóbi jylap ta aldy. Mundaı sumdyq jaǵdaıǵa tap bolamyz dep kim oılaǵan. Jasandy ıntellektiniń sebebinen kez kelgenimiz zardap shegýimiz múmkin», - deıdi oqýshy Frenchesko Manı.
Jalǵan sýretter tamyz aıynda taraǵan. Biraq, ol týraly kópshilikke endi ǵana málim bolyp otyr. Arada tolyq eki aı ótse de buzaqylyq jasaǵan balaǵa eshqandaı shara qoldanylmaǵan. Qazir tergeý júrip jatyr. Alaıda, zardap shekken otbasylar ony mektepten shyǵarýdy jáne jazaǵa tartýdy talap etýde.
«Maǵan mektep ókilderi habarlasyp, birneshe oqýshy qyzdyń túrlerin paıdalaný arqyly jalǵan jalańash sýretter snapchattaǵy toptarda taralyp jatqanyn habarlady. Alǵash estigende shok boldym. Endi eshbir ata-ana mundaı jaǵdaıǵa daıyn bolmasy anyq. Keıin mekteptiń qareketsiz otyrǵanyna qarap, kóńilim tústi», - deıdi ata-ana Dorota Manı.
Dál osyndaı jaǵdaı Vashıngton shtatynda da boldy. Sıetl qalasynda orta mektepte oqıtyn qyzdardyń jańalańash beınelerin jasaǵan jasóspirimniń ústinen tergeý bastaldy. Jalpy, táýelsiz zertteýshilerdiń habarlaýynsha jyl basynan beri elde 143 myńnan astam dıp feık vıdeo men sýret ǵalamtorǵa júktelgen.