Qazaqstanda bilimdi de jigerli jastardyń kezekti legi "Elbasy medalin" aldy
Marapat elimizdiń ár aımaǵynda 4 myńǵa jýyq belsendi jasqa tabystaldy, dep habarlaıdy Almaty-akshamy.kz
Bul joba Tuńǵysh Prezıdent – Elbasy Nursultan Nazarbaevtyń «El Úmiti» bastamasy aıasynda ázirlendi. Ulttyq deńgeıdegi biregeı baǵdarlama daryndy jastardy keshendi damytýǵa baǵyttalǵan.
Oǵan 14 pen 29 jas aralyǵyndaǵy qazaqstandyqtar qatysady. Úmitker qola, kúmis nemese altyn deńgeıdiń birin tańdap, 6-dan 18 aıǵa deıin qurylǵan baǵdarlamanyń talaptaryn oryndaıdy.
Biliktilikti damytý 7 baǵytty qamtıdy. Atap aıtsaq sport, daryn men daǵdy, kitap oqý, ulttyq mura, volonterlik, saıahattar men joryqtar, eńbek tájirıbesi jetildirilip, synalady.
2 jyldyń ishinde bul jobaǵa elimizdiń ár óńirinen 20 myńnan astam jas óren jumyldyrylǵan.
«Aǵymdaǵy jyly medaldiń ıegerleri bilim granttaryn alýda artyqshylyqtarǵa ıe boldy. Qazaqstan Respýblıkasy boıynsha 605 túlekke osyndaı bilim granttary berildi. Onyń ishinde 30% astamy - aýyl mektepterin bitirgen túlekter», - dedi «Elbasy Akademıasy» korporatıvtik qory dırektorynyń keńesshisi Marjan Imanǵalıeva.
Elbasynyń qola medaliniń ıegeri Áspet Kenjeqara pikir bildirdi.
«Ótinishti "Elbasy medali" sertıfıkaty arqyly berdim. Odan keıin jaýapty kúttim. Keıin Eýrazıa Ulttyq ýnıversıtetine grantqa túskenim jaıly habar keledi. Shyny kerek, qatty qýandym. Sebebi ata-anamnyń úmitin aqtaý meniń erekshe armandarymnyń biri boldy. "Elbasy medali" jobasy arqyly ózimdi ár saladan jaqsy damyta aldym desem, artyq etpeıdi», - dedi ol.