Almatyda 2023 jyly Jetisý jáne Áýezov aýdandarynda 2 jańa emhana ashyldy, sonymen qatar, 2023 jyldyń sońyna deıin aıaqtaý josparlanyp otyrǵan 4 ODA (otbasylyq dárigerlik ambýlatorıa) qurylysy bastaldy.
Bul týraly Almaty qalasynyń ákimi Erbolat Dosaev QR Prezıdenti Qasym-Jomart Toqaevtyń qatysýymen ótken Almaty qalasyn damytý jónindegi keńeste málimdedi, dep habarlaıdy Almaty-akshamy.kz.
«Qazirgi ýaqytta aldyńǵy qatarly halyqaralyq tájirıbe bazasynda ázirlengen MSAK (medısınalyq-sanıtarlyq alǵashqy kómek) jańa biryńǵaı standartyna sáıkes, 11 emhana men ODA úshin JSQ ázirleý júrgizilýde. Bul standart medısınalyq kómek kórsetý reglamenterine, jobalyq-tehnologıalyq sheshimderge, sıfrlandyrýǵa jáne emhanalardyń menedjmentine qoljetimdilik, sapa, tehnologıalylyq jáne jaılylyq syndy 4 negizgi krıterıı boıynsha túbegeıli ózgeristerdi kózdeıdi. Qalanyń jumys istep turǵan 10 iri kópsalaly stasıonarlary men perzenthanalaryn salý jáne jańǵyrtý boıynsha keshendi baǵdarlama bastaldy», – dedi Erbolat Dosaev.
Ári onyń aıtýynsha, densaýlyq saqtaýdyń kadrlyq áleýetin kúsheıtýge erekshe kóńil bólinedi. Osylaısha, 3 500 dáriger men medbıke elimizdiń ǵylymı medısınalyq ortalyqtary men Germanıa, Izraıl, Túrkıa klınıkalarynda biliktiligin arttyrady. Qalanyń tapsyrysy boıynsha bıyl 1 qyrkúıekten bastap 140 rezıdent pen magıstrantty oqytý bastalady.
«Jalpy, bıyl birinshi jartyjyldyqta biz negizgi kórsetkishterdiń jaqsarǵanyn kóremiz. Jalpy ólim-jitim 11%-ǵa, ana ólimi 32,4%-ǵa, sábı ólimi 35,5%-ǵa tómendedi», - dedi qala basshysy.