Bıylǵy jyldyń birinshi jartysynda saqtandyrylǵan almatylyqtar MÁMS júıesi arqyly jalpy quny 79,2 mlrd teńge bolatyn medısınalyq kómek túrlerin paıdalanǵan. Bul týraly Óńirlik komýnıkasıalar qyzmetiniń alańynda ótken brıfıńte Medısınalyq saqtandyrý qorynyń Almaty qalalyq fılıaly dırektory Tileýhan Ábildaev habarlady.
Aıtýynsha, shyǵynnyń basym bóligi, ıaǵnı 44,1 mlrd teńge stasıonarlyq medısınalyq kómekke, 3,2 mlrd teńge – kúndizgi stasıonarlar kórsetken qyzmetterge tólendi.
«Medısınalyq kómekke júgingen azamattar tarapynan emdeý men dıagnostıkanyń baǵasy qymbat túrleri, salalyq mamandardyń konsýltasıalary, sondaı-aq zerthana taldaýlaryna degen suranys joǵary bolǵan. Jarty jylda atalǵan qyzmetterge 14,6 mlrd teńge jumsaldy», - dedi fılıal basshysy.
Fılıal basshysynyń sózine qaraǵanda, sonyń ishinde kompúterlik tomografıa men magnıtti-rezonanstyq tomografıaǵa (KT/MRT) degen suranys burynǵysha joǵary kúıinde qalyp otyr. Alty aıda Almaty qalasynda jalpy somasy 890,5 mln teńgeni quraıtyn 46 myńnan astam KT jasalǵan. Taǵy 33 myńnan astam MRT qyzmetine Qor 542 mln. teńge bóldi. Sonymen qatar, onkologıalyq naýqastardy nysanaly túrde tekserýge arnalǵan 6,4 myń pozıtrondy-emıssıondyq tomografıa jasalǵan, oǵan 2,2 mlrd teńgeden astam qarjy tólengen.
«Mindetti áleýmettik medısınalyq saqtandyrý esebinen kún saıyn quny birneshe mıllıonǵa jetip jyǵylatyn joǵary tehnologıaly operasıalar jasalyp jatyr. Bıylǵy jyldyń 6 aıynda Almaty qalasynda osyndaı otalarǵa 11,7 mlrd.teńge jumsalypty. Jarty jylda almatylyq stasıonarlar mıdaǵy qan-tamyrlary men qan-tamyr júıelerine 2 226 ota jasaǵan. Operasıalardyń jalpy quny 2,7 mlrd. teńgeden asty. Sonymen qatar, saqtandyrýdyń arqasynda transplantologıalyq operasıalar da kedergisiz jasalyp jatyr. Jarty jylda 34 búırek almastyryldy, onyń jalpy quny 170 mln teńgeni qurady», - dedi Tileýhan Ábildaev.