Medısınalyq saqtandyrý qory Almaty qalasynyń densaýlyq saqtaý salasyna qosymsha 7 mlrd teńge bóldi. Bul týraly Óńirlik komýnıkasıalar qyzmetinde ótken brıfıńte MSQ Almaty fılıaly dırektory Tileýhan Ábildaev habarlady.
Aıtýynsha, qosymsha qarjy Almatyda mindetti áleýmettik medısınalyq saqtandyrý paketindegi qyzmetterdi paıdalaný kórsetkishiniń joǵary bolýyna baılanysty bólinip otyr.
«Jalpy, ońtústik astanada medısınalyq qyzmetke júginý kórsetkishi óte joǵary. Sondyqtan Qor ótken aptada qaladaǵy medısına mekemelerin qarjylandyrýǵa 7 mlrd teńgege jýyq qarjy bóldi. Bólingen qarajattyń 2,8 mlrd teńgesi konsýltatıvtik-dıagnostıkalyq qyzmetterge, 4,1 mlrd teńgesi – stasıonarlyq kómekke, 164,5 mln teńgesi joǵary tehnologıalyq qyzmetterge jumsalmaq», - dedi Tileýhan Ábildaev.
Fılıal basshysynyń dereginshe, bıyl Almaty qalasy densaýlyq saqtaý salasy búdjeti 302,4 mlrd. teńgeni qurap otyr. Onyń 156,7 mlrd teńgesi – kepildendirilgen tegin medısınalyq kómekke, 145,7 mlrd. teńgesi MÁMS paketine tıesili. Salystyrar bolsaq, bul ótken jyldyń búdjetinen 17% artyq, dedi ol.
Sonymen qatar, Tileýhan Ábildaev medısına uıymdaryna bólinetin qarjy qysqartyldy degen qaýesettiń shyndyqqa janaspaıtynyn atap ótti.
«Sońǵy kezde jurtshylyq arasynda Qor medısına uıymdaryna bólinetin qarajatty qysqartty, sol sebepti halyqqa kórsetiletin kómek kólemi de qysqardy degen pikir taraǵany jasyryn emes. Bólingen qarjy kólemi jyl saıyn artpasa, kemip jatqan joq. Jalpy, Qor kepildendirilgen tegin medısınalyq kómek pen MÁMS sheńberinde halyqqa kórsetilgen qyzmet aqysyn tóleıtin qarjy operatory. Iaǵnı, kelisimshart belgili bir somaǵa bekitiledi, klınıka sol somaǵa jyl boıy qyzmet kórsetedi. Artyq tutynýdy boldyrmas úshin medısına uıymdary kórsetiletin qyzmet kólemin ár aıǵa bólip otyrýy tıis», - dedi fılıal dırektory.
Esterińizge sala ketsek, Qor kórsetilgen qyzmetterdiń sapasyn tekseredi jáne qyzmet aqysy tıisti monıtorıńten keıin ǵana tólenedi. Ádette, monıtorıń barysynda standarttar men normatıvterden aýytqý syndy aqaýlar anyqtalyp jatady. Emdeý mekemelerine aıyppul salynady, kórsetilgen qyzmet somasy tolyǵymen nemese onyń belgili bir bóligi Qorǵa qaıtarylady. Al, kórsetilmegen qyzmetti kórsetildi dep qosyp jazǵan klınıkalar úsh ese aıyppul salynady.