28 maýsymda Óńirlik komýnıkasıalar qyzmetiniń alańynda sóılegen sózinde Almatynyń sanıtarlyq-epıdemıologıalyq baqylaý departamentiniń basshysy Jandarbek Bekshın maýsym aıynda qalada koronavırýs juqtyrýdyń 3 800 jaǵdaıy tirkelgenin aıtty.
Almatynyń bas sanıtarlyq dárigeri turǵyndardy epıdemıologtar men dárigerlerge jaýapkershilikpen qaraýǵa shaqyrdy, dep habarlaıdy Almaty-akshamy.kz.
Dárigerdiń aıtýynsha, qazir sanıtarlyq qaýipsizdik erejelerin saqtaý óte mańyzdy: betperde taǵý, áleýmettik qashyqtyqty saqtaý, qoldy jıi jýý men vaksına alý.
«Jyl basynan beri Almatyda KVI-diń 55 101 jaǵdaıy anyqtaldy. Al maýsym aıynda 3 889 jaǵdaıy tirkeldi. Ótken aptada koronavırýs derti 1,7 ese ósti. 742-den 1237-ge deıin. Sońǵy táýlikte KVI-diń 215 jaǵdaıy tirkeldi», - dedi J. Bekshın
Onyń aıtýynsha, Almatydaǵy epıdemıologıalyq jaǵdaı kontagıozdy mýtasıalanǵan "delta"shtamynyń taralýyna baılanysty ýshyǵýda.
Epıdemıologtardyń aıtýynsha, PTR ortasha táýliktik oń nátıjeleri 114-ten 188-ge deıin ósti. Sońǵy aptada sımptomdary bar KVI-men aýyratyndardyń úles salmaǵy 32%-dan 53%-ǵa deıin artty, bul COVID-19 «delta» shtamynyń tez taraıtynyn kórsetti.
«Vırýs juqtyrǵandar sanynyń kúrt ósýine baılanysty biz mýtasıalanǵan shtamdarǵa zertteý júrgizdik. Nátıjesinde KVI naýqastarynan alynǵan 131 úlginiń 77 «álfa", brıtandyq shtamdar, 46 úlgide «delta» úndi shtamdary anyqtaldy. Sonymen qatar, eki «gamma», ońtústik afrıka shtammdary men bir nú-ıorktik «betta» shtamy tirkeldi. Jalpy epıdemıologıalyq jaǵdaıdyń kúrdelenýi «álfa» shtamynyń taralýynyń, al aýrýdyń kóbeıýi Nur-Sultan qalasy men Reseıden ákelingen «delta» shtamynyń saldarynan», - dedi Jandarbek Bekshın.
Almaty qalasynyń bas sanıtarlyq dárigeri qabyldanǵan shekteý sharalaryn mindetti túrde oryndaý qajettigin aıtty. Jandarbek Bekshınniń aıtýynsha, jalpy dertti juqtyrmaýdyń jalǵyz joly – vaksına alý men sanıtarlyq normalardy saqtaý.