Ótken apta aıaǵyna qaraı Memleket basshysy jańa Salyq kodeksine qol qoıdy. Qujat 2026 jylǵy 1 qańtardan bastap kúshine enedi. Jańa zań elimizdiń salyq júıesin jeńildetip qana qoımaı, áleýmettik ádildikti arttyrýǵa, kóleńkeli ekonomıkany azaıtýǵa baǵyttalǵan. Kodeksti ázirleý barysynda 300-den asa sarapshy, sala mamandary men kásipkerler qatysyp, usynystar eskerildi. Aqshamnews.kz tilshisi bul ózgeristiń kimderge tıimdi bolaryn jáne onyń qandaı artyqshylyqtary baryn baǵamdap kórdi.
Áleýmettik salaǵa arnalǵan jeńildikter
• Qoǵam úshin mańyzdy dári-dármekterge QQS — 0%
Onkologıa, sırek kezdesetin aýrýlar, qant dıabeti, psıhıkalyq dertter syndy aýyr dıagnoz qoıylǵan azamattarǵa qajetti dáriler endi qosylǵan qun salyǵynan bosatylady.
• Medısınalyq qyzmet túrlerine de QQS salynbaıdy
GOBMP (garantıalanǵan tegin medısınalyq kómek) pen OSMS (mindetti medısınalyq saqtandyrý) aıasyndaǵy qyzmetter men dári-dármekterge salyq salynbaıdy.
• Basqa dári-dármek pen medısınalyq qyzmetter úshin
QQS mólsheri eki kezeńmen tómendeıdi:
2026 jyly — 5%
2027 jyly — 10%
• Zeınetaqy tólemderine salyq salynbaıdy
Biryńǵaı jınaqtaýshy zeınetaqy qorynan tólenetin zeınetaqylar jeke tabys salyǵynan bosatylady.
• Múgedektigi bar azamattarǵa arnalǵan jeńildik
Áleýmettik shegerim kólemi 882 AEK-ten 5000 AEK-ke deıin kóbeıtildi.
Rýhanıat pen bilimge qoldaý
• Kitaptar men baspa ónimderi QQS-tan bosatylady
Memleket rýhanıat pen bilim salasyna naqty qoldaý kórsetip otyr. Balalar ádebıeti, oqýlyqtar men ǵylymı kitaptar endi salyqsyz satylady.
• Otandyq baspa uıymdary úshin QQS — 10%
Gazet-jýrnaldardan bastap aýyl mektepteriniń basylymdaryna deıin jeńildetilgen mólsherleme qoldanylatyn bolady.
Bızneske arnalǵan ózgerister
• Salyqtar men eseptilik azaıdy
Salyq túrleri — 20%-ǵa
Salyqtyq eseptilik kólemi — 30%-ǵa qysqarady.
• QQS mólsheri 16% bolyp bekitildi
Salyq esebine tirkelý shegi — 40 mln teńge.
• Korporatıvtik tabys salyǵy
Jalpy mólsherleme — 20%
Bank jáne oıyn bıznesi úshin — 25%
• Aýyl sharýashylyǵy ónimin óndirýshiler úshin
3% jeńildetilgen mólsherleme saqtalady.
• Avtokólik salyǵy
10 jyldan artyq qoldanǵan kólikterge salyq mólsheri tómendetiledi.
Tabysqa qaraı salyq salý
• Joǵary tabysy bar azamattar úshin
Jyldyq tabysy 33 mln teńgeden asatyndardan — 15% mólsherinde tabys salyǵy alynady.
• Qymbat múlikke salyq ósedi
Quny 75 mln teńgeden joǵary avtokólikterge
Quny 450 mln teńgeden asatyn jyljymaıtyn múlikke salyq mólsheri ulǵaıady.
Sarapshy ne deıdi?
Ekonomıs Baýyrjan Ysqaqov jańa Salyq kodeksiniń birneshe artyqshylyǵyn atap ótti:
1. Kásipkerlikke jaǵdaı jeńildeıdi
Salyqtyq ákimshilendirý ońaılaıdy. Bul shaǵyn jáne orta bıznes úshin tıimdi.
2. Sıfrlandyrýdy arttyrady
Onlaın baqylaý men avtomatty esep júrgizý — kóleńkeli ekonomıkany azaıtyp, ashyqtyqty qamtamasyz etedi.
3. Investısıalyq tartymdylyq artady
Inovasıalyq, jasyl ekonomıka jobalaryna jeńildikter engizilýi múmkin.
4. Áleýmettik ádilettilik kúsheıedi
Progresıvti salyq júıesi arqyly tabysy joǵary azamattardan kóbirek salyq alynbaq. Bul qoǵamdaǵy teńsizdikti azaıtýǵa sep.
5. Búdjettik turaqtylyqty qamtamasyz etedi
Salyq bazasy keńeıip, qosymsha túsimder áleýmettik baǵdarlamalarǵa baǵyttalady.
«Jańa Salyq kodeksi – bul tek fıskaldyq emes, strategıalyq qujat. Ol el ekonomıkasynyń baǵytyn aıqyndaıtyn mańyzdy qural», – deıdi sarapshy.
Jańa Salyq kodeksi – el ekonomıkasyn jańǵyrtýǵa, áleýmettik ádilettilik ornatýǵa jáne kásipkerlikke qoldaý kórsetýge baǵyttalǵan keshendi qadam. Salyq júıesiniń ózgerýi halyqtyń ómir sapasyna da, eldegi jalpy ekonomıkalyq ahýalǵa da oń áserin tıgizbek.