Almatylyq qutqarýshylar qala turǵyndaryn qaýipsizdik sharalaryn saqtaýǵa shaqyrady
Almaty qutqarýshylary qala turǵyndaryn jańa jyldyq is-sharalar kezinde órt qaýipsizdigi erejelerin saqtaýǵa shaqyrady. Bul týraly Almaty qalasy Tótenshe jaǵdaılar departamenti Memlekettik órtke qarsy baqylaý basqarmasy basshysynyń orynbasary Erbolat Tórtqaraev ÓKQ alańynda sóılegen sózinde eskertti, dep habarlaıdy Almaty-akshamy.kz.
Spıkerdiń aıtýynsha, Almatyda jyl saıyn jańajyldyq mereke kúnderi orta eseppen 11 órt oqıǵasy oryn alady. Bul rette órt oqıǵalarynyń jalpy sanynyń 18%-ǵa jýyǵy pırotehnıkalyq buıymdardy durys paıdalanbaý saldarynan oryn alady.
Sońǵy 5 jylda 56 órt shyqqan, onyń 10-y pırotehnıka saldarynan bolǵan.
«Ótken jylǵy jańajyldyq mereke kezinde pırotehnıkalyq buıymdarǵa abaısyz qaraýdyń saldarynan medısınalyq mekemelerge 39 adam (onyń 29-y balalar) júgingen. Aýrýhanaǵa 8 adam jatqyzylǵan, onyń 7-eýi balalar», - dedi ÓKQ spıkeri statısıkalyq derekterden keltire otyryp.
Órtterdiń aldyn alý jáne eskertý, sondaı-aq pırotehnıkalyq buıymdardy durys paıdalanbaý saldarynan bolatyn jazataıym oqıǵalardy boldyrmaý maqsatynda Almaty qalasy TJD azamattardyń qaýipsizdigin qamtamasyz etýge baǵyttalǵan uıymdastyrý sharalary keshenin júrgizýde.
Qutqarýshylar jappaı adamdar turatyn nysandarda ornatylǵan 72 jańajyldyq shyrshany esepke aldy. Olardyń órt qaýipsizdigi talaptaryna sáıkestigi tekserilip, aldyn alý sharalaryn kúsheıtý boıynsha usynystar berildi.
Sondaı-aq, jappaı syrǵanaý úshin muz aıdyndary uıymdastyrylatyn 14 nysan nazarǵa alyndy, osy nysandardyń ıelerimen jappaı is-sharalar ótkizý kezinde órt qaýipsizdigin qamtamasyz etý qajettigi týraly profılaktıkalyq áńgimeler júrgizildi.
Almaty qalalyq polısıa departamentimen birlesip, «PIROTEHNIKA» jedel-profılaktıkalyq is-sharalar jospary kelisilip, bekitildi. Soǵan sáıkes, 25 jeltoqsannan bastap zań buzýshylarǵa jedel áreket etý sharalaryn qoldana otyryp, pırotehnıkalyq buıymdar satylatyn oryndarda reıdter uıymdastyrylady.
Bul rette TJD qyzmetkerleri pırotehnıkalyq buıymdardy satýshylarmen profılaktıkalyq áńgimelesýler júrgizedi, buǵan deıin 20 kezdesý men dóńgelek ústelder ótkizilip, onyń barysynda pırotehnıkalyq buıymdardy saqtaý jáne paıdalaný kezindegi órt qaýipsizdigi talaptary túsindirildi.
Erbolat Tórtqaraev Almaty turǵyndary men qonaqtaryna pırotehnıkalyq buıymdardy satyp alý tek arnaıy dúkenderde ǵana júrgizilýi kerektigin, bul rette ónimniń qaptamasynyń myjylǵan nemese deformasıalanbaýyn qadaǵalaý kerektigin eskertti. Sondaı-aq ónimniń jaramdylyq merzimine nazar aýdarý kerek, nusqaýlardy muqıat oqý qajet!
Pırotehnıkany qurǵaq úı-jaıda jáne jylý kózderinen barynsha alysyraq saqtaý kerek.
Pırotehnıkany qoldaný kezinde:
-balalardyń óz betimen raketalar men petardalardy qosýyna jol bermeńiz;
-qaýipti aımaq (50 metr) radıýsynda pırotehnıkany qosýǵa kedergi bolatyn eshteńe joǵyna kóz jetkizińiz;
-pırotehnıkany tutatý kezinde eshqashan qoraptyń ústine eńkeımeńiz;
-fıtıldi tutatý kezinde qol sozym aralyǵyndaı oryn qaldyryńyz;
-ónimdi qatty jel kezinde qospańyz;
-pırotehnıkany, eger ol iske qosylmaǵan bolsa, qaıta qosýǵa tyryspańyz;
-raketalar men feıerverkterdi adamdar men janýarlarǵa qaratpańyz, hlopýshkalardy aıaq astyna tastamańyz;
-feıerverkterdi qosý alańy men turǵyn úılerge deıingi eń az qashyqtyq 50 metr bolýy kerek. Alańda aǵashtar, elektr jelileri jáne basqa da kedergiler bolmaýy kerek, bul otshashýlar baǵytyn ózgerte alady.