Jalpyǵa birdeı deklarasıalaýdyń negizgi maqsaty – azamattardyń kiris mólsherine qaraı ádil salyq salýdy qamtamasyz etý bolyp tabylady.
Salyq tóleýden jaltarǵandardy anyqtaý kóleńkeli ekonomıkanyń deńgeıin tómendetýge múmkindik beredi, dep habarlaıdy almaty-akshamy.kz.
Kóleńkeli aınalymdy azaıtýdyń tıimdi ádisteriniń biri – azamattar ómiriniń ajyramas bóligine aınalǵan qolma-qol aqshasyz tólemderge kóshý bolyp tabylady.
Qazaqstan qarjygerler qaýymdastyǵynyń málimetterine sáıkes Qazaqstanda 9 aıdyń qorytyndysy boıynsha qolma-qol aqshasyz tólemderdiń úlesi 86%-ǵa deıin ósti (ótken jyly – 82%).
Eresekterden basqa, 6 jastan bastap balalar da qolma-qol aqshasyz tólemderdi belsendi paıdalanady, ata-analardyń 41,4%-y balalaryna karta rásimdegen (Kursiv Research sosıologıalyq zertteýler ortalyǵynyń derekteri).
Bankterdegi jeke tulǵalar depozıtiniń sany 16,9 mıllıonnan 19,8 mıllıonǵa deıin ósti, jyldyq ósim 14,3%-dy qurady, depozıtterdiń jalpy kólemi 18,6 trln teńgeni qurady. (Qazaqstannyń depozıtterge kepildik berý qorynyń derekteri).
Memleket salymdarǵa kepildik berý júıesine 19 qatysýshy banktiń árqaısysynda 20 mıllıon teńgege deıingi banktik salymdar boıynsha ótelýine kepildik beredi.
El aınalymyndaǵy qolma-qol aqshanyń mardymsyz somasyn eskere otyryp, árbir azamat deklarasıalaý kezinde 34,5 mıllıon teńgeden (10 000 AEK) aspaıtyn qolma-qol aqshany kórsete alady. Ózge qarajattyń bolýyn ekinshi deńgeıdegi bankter rastaıdy.
Salyq kodeksinde bankterdiń salyq tóleýshilerdiń banktik shottary týraly málimetterdi salyq organdaryna berýge mindettiligi qarastyrylǵan (Salyq kodeksiniń 26-baby).
Bul talap Konstıtýsıanyń normalaryna qaıshy kelmeıdi, óıtkeni bul quqyqty shekteýge zańda naqty belgilengen jaǵdaılarda jáne tártippen jol beriledi (Konstıtýsıanyń 18-babynyń 2-tarmaǵy).
Osyǵan baılanysty «Bankter jáne bank qyzmeti týraly» Zańnyń (50-bap) jáne Salyq kodeksiniń (30-bap) normalary salyq salý maqsatynda bank qupıasyn jarıa etýdi kózdeıdi.
Sheteldegi jáne Qazaqstandaǵy aktıvterdi barynsha anyq deklarasıalaý qajet ekenine nazar aýdaramyz. Aldaǵy ýaqytta salyq salynatyn kiristi anyqtaý kezinde aktıvterdiń quny eskeriletin bolady.