Atyraýda Jaıyq ózenine 3,5 mln bekire tuqymdas balyq shabaǵy jiberildi, dep habarlaıdy Almaty-akshamy.kz QazAqparatqa silteme jasap.
Balyq sharýashylyǵy komıtetiniń baspasóz qyzmetinen málim etkendeı, «Jaıyq-Atyraý» bekire balyq ósirý zaýytynyń mamandary Jaıyq ózenine 3,5 mln dana bekire tuqymdas balyq túrleriniń shabaǵyn jibergen.
«Bul jumys balyq resýrstaryn molaıtý jónindegi memlekettik tapsyrys sheńberinde bekire tuqymdas balyq túrleriniń qoryn saqtaý, qalpyna keltirý maqsatynda jyl saıyn júrgiziledi. Bekire shabaqtaryn sý aıdyndaryna jiberý Jaıyq-Kaspıı oblysaralyq baseındik balyq sharýashylyǵy ınspeksıasy qyzmetkerleriniń, jergilikti atqarýshy organ, qoǵamdyq jáne ǵylymı uıymdar ókilderiniń qatysýymen júzege asyryldy. Baǵaly bekire tuqymdasyna jatatyn qortpa, shoqyr, orys bekiresi, súırik balyqtarynyń shabaǵy zaýytta jasandy túrde ósirildi», - dep habarlady komıtettiń baspasóz qyzmeti.
Jyl saıyn Jaıyq ózeniniń uıyqtyq ýchaskelerinde bekire tuqymdas balyq túrleriniń atalyǵy men analyǵy aýlanady. Odan ári ınkýbasıalaý úshin balyqtan tiri kúıinde ýyldyryq pen shoǵal alynady.