Oqıǵa ornynda múlikke kelgen zalaldy baǵalaıtyn komısıa jumys istep jatyr.
QR Tótenshe jaǵdaılar mınıstri Iýrıı Ilın BAQ ókilderine Jambyl oblysyndaǵy jarylys saldaryn joıý úshin qansha kún kerek ekenin aıtty, dep habarlaıdy Almaty-akshamy.kz QazAqparat-qa silteme jasap.
«Búgingi tańda eki qoımada byqsyp jatqan oshaqtar bar. Osy másele boıynsha jınalys ótkizdik. Qorǵanys mınıstrliginiń saperleri men órt sóndirý qyzmeti atalǵan oshaqtarda jumys istep jatyr. Jarylmaı qalǵan oq-dáriler bar. Tótenshe jaǵdaılar mınıstrliginiń bólimsheleri byqsyp jatqan oshaqtardy óshirý úshin sý tasyp, evakýasıalanǵan turǵyndardy úılerine qaıtarýmen aınalysyp júr. Oqıǵa ornynda múlikke kelgen zalaldy baǵalaıtyn komısıa jumys istep jatyr. Menińshe, jaqyn kúnderi olar qıraǵan múlikti qalpyna keltirýge kirisedi. Qaýip tolyq seıilmegenin eskersek, oqıǵanyń epısentrinde qaıta jarylys bolýy múmkin. Temirjol boıynsha júk tasymaly toqtap tur. Al jolaýshylar tasymaly búgin sheshilýi kerek dep oılaımyn», - degen mınıstr áli de asyǵýǵa bolmaıtynyn túsindirdi.
«Munyń bári jalpy ahýalǵa baılanysty. Óıtkeni qırandylardy arshyp, tazartý úshin biraz ýaqyt kerek, kóp shyǵyn ketedi. Onda oq-dárimen jumys istep jatqan saperlerdiń amandyǵy mańyzdy ekenin túsinetin shyǵarsyzdar. Betin ári qylsyn, asyǵystyq jasap, olardy qaýipke ıtermeleı almaımyz. Jarylystyń saldaryn tolyq joıý úshin arnaıy jumys tobymen, ákimdikpen, Qorǵanys mınıstrligimen birlese otyryp, taǵy eki-úsh kún jumys isteý qajet bolady dep oılaımyn», - dedi Iýrıı Ilın BAQ ókilderine.