Dúbirli dodada 56 elden 4200 sportshy baq synaýda
Túrkıanyń Koná qalasynda Islam yntymaqtastyǵy V oıyndarynyń saltanatty ashylý rásimi ótti. Jarys 5 tamyzda bastalǵanyna qaramastan Qazaqstan quramasy 5 medal enshilep úlgerdi, dep habarlaıdy Almaty-akshamy.kz.
Saltanatty is-sharaǵa Túrkıa prezıdenti Redjep Taııp Erdogan, Ázirbaıjan prezıdenti Ilham Álıev, Islam Yntymaqtastyq Uıymynyń Bas hatshysy Hýseın Ibragım Taha, sondaı-aq birqatar elderdiń úkimet basshylary men mınıstrleri arnaıy qatysty.
Dúbirli dodada 56 elden 4200 sportshy baq synaýda. Qazaqstan namysyn 125 sportshy sporttyń 16 túrinen qorǵaıdy.
Sportshylar sherýinde Qazaqstannyń Týyn kóterý qurmetine semserlesýden 23 jasqa deıingi Azıa chempıony – Erlik Sertaı ıe boldy.
«V Islam yntymaqtastyq oıyndarynyń ashylý saltanatynda týdy ustap shyǵýdy maǵan senip tapsyrǵany úshin elimizdiń sport qoǵamyna alǵysymdy bildiremin. Bul men úshin úlken jaýapkershilik jáne mártebe. Aldaǵy jarystarda joǵary nátıje kórsetip, el senimin aqtaımyz degen úmittemin»,-deıdi Erlik Sertaı.
Baıraqty básekege Qazaqstan quramasyn bastap barǵan Sport jáne dene shynyqtyrý isteri komıteti tóraǵasynyń orynbasary Aıgúl Bektenova sportshylar babynda ekenin jetkizdi.
«Saltanatty ashylý rásimi búgin ótip jatqanymen sport túrlerinen jarystar 5 tamyz bastaý alǵan bolatyn. Qazirgi tańda el quramasy 5 altyn, 1 kúmis, 5 qola júldemen jalpy komandalyq esepte úshinshi orynǵa jaıǵasty. Bul óte joǵary kórsetkish. Sportshylarymyz jaqsy daıyndyqpen keldi. Jarys joǵary deńgeıde uıymdastyrylǵan»,-dedi Aıgúl Baqytjanqyzy.
Esterińizge sala keteıik, osyǵan deıin otandyq sportshylar eki Islam yntymaqtastyq oıyndaryna qatysyp, 2017 jylǵy İV Islam yntymaqtastyq oıyndaryna Qazaqstan quramasy qatarynda 7 sport túrinen 35 sportshy óner kórsetip, nátıjesinde 2 altyn, 5 kúmis, 12 qola júldemen jalpykomandalyq esepte 14 orynǵa ornyqqan bolatyn.
V Islam yntymaqtastyq oıyndary 2021 jyly ótýi kerek edi, biraq pandemıaǵa baılanysty 1 jylǵa keıinge qaldyryldy.