Áleýmettik jelidegi keıbir ózgerister
Instagram qyzmeti paıdalanýshylardan jeke basyn rastaý úshin beıne selfı suraı bastady. Jańa tekserýlerdi brıtandyq maman jáne áleýmettik medıa keńesshisi Mett Navarra óziniń Twitter paraqshasynda jarıalady, dep habarlaıdy Almaty-akshamy.kz tilshisi Izvestıa basylymyna silteme jasap.
Jeke tulǵańyzdy rastaý úshin betińizdi ártúrli buryshtardan kórsetý kerek. Naqtylanǵandaı, túsirý kezinde kamera adamnyń kóziniń deńgeıinde bolýy kerek jáne ol tómen qaramaýy kerek, dep jazady Life.ru.
Aldyn ala málimet boıynsha, Instagram bul qyzmetti 2020 jyly synaı bastaǵan, biraq tehnıkalyq aqaýlarǵa baılanysty jumysyn toqtatqan. Áleýmettik jeliniń ózinde olar beıne selfıdiń kómegimen akkaýnt kúdikti túrde belsendi bolǵan jaǵdaıda ǵana jeke basyn tekseretinin túsindirdi. Mysaly, eger paıdalanýshy kútpegen jerden birneshe sekýnd ishinde kóptegen akkaýnttarǵa jazylsa nemese birden birneshe laık jınasa osyndaı kúdikke ilinýi múmkin.
Sonymen qatar, 17 qarashada Instagram betti taný tehnologıasyn paıdalanbaıtynyn basa aıtty. Beıne selfı tirkelgini shyn máninde bot emes, naqty adam paıdalanyp jatqanyna kóz jetkizý úshin qajet.
Beınejazbalardy áleýmettik jeli qyzmetkerleri kóredi, olar 30 kúnnen keıin joıylady.
10 qarashada Instagram servısiniń basshysy Adam Mosserı áleýmettik jeli qoldanýshylarǵa arnany kórýden úzilis jasaýdy eske salatyn jańa quraldy synaqtan ótkize bastaǵanyn habarlady.