Qazaqstandyqtarǵa smartfonyn tirkeýge qatysty kelgen SMS-habarlamada telefondy verıfıkasıalaýǵa 30 kún ýaqyt beriletini eskertiledi, dep habarlaıdy aqshamnews.kz
Bıyl 24 naýryzda Qazaqstanda engizilgen jańa IMEI verıfıkasıasy erejeleri osy kúnnen bastap kúshine enedi. Olar jalǵyz tek jańa, ıaǵnı 24 naýryzdan keıin elge ákelingen qurylǵylarǵa qatysty. Buryn ákelingen nemese tirkelgen telefondarǵa qosymsha shekteýler qoıylmaıdy – olar avtomatty túrde aq tizimge kiredi jáne qalypty jumys isteıdi
Verıfıkasıa – bul telefonnyń IMEI kodyn avtomatty túrde tekserý prosesi. Tekserý halyqaralyq GSMA bazasymen jáne Qazaqstannyń memlekettik organdarymen (Memlekettik kirister komıteti, UQK) biriktirilgen júıe arqyly júrgiziledi.
IMEI kodty tirkeý ne úshin qajet?
Qazaqstanda telefondar men smartfondardyń zańsyz ákelinýi men urlyǵy kóptep kezdesedi. Bir qurylǵynyń IMEI kodyn birneshe telefonǵa qoldaný jaǵdaılary bolǵan. Bul memleketke salyq túsiminiń azaıýyna, kóleńkeli naryqtyń kóbeıýine jáne abonentterdi qorǵaýdyń álsireýine ákeledi. Sondyqtan IMEI kodyn tirkeý júıesi engizildi. Ol zańsyz qurylǵylardy buǵattap, tek zańdy satyp alynǵan telefondardyń ǵana baılanys qyzmetin paıdalanýyn qamtamasyz etedi.
IMEI kod boıynsha 3 tizim
Aq tizim
Qurylǵy zańdy jolmen ákelingen jáne durys tirkelgen.
Baılanys qyzmetin esh kedergisiz paıdalana beredi.
Sur tizim
Qurylǵynyń mártebesi kúmándi.
Operator ıesine SMS jiberedi, 30 kún ishinde arnaıy anketany toltyryp, ıeligin rastaýy kerek.
Ýaqytynda tirkelmese, telefon buǵattalady.
Qara tizim
Urlanǵan, qoldan jasalǵan nemese zańsyz ákelingen telefondar.
Mundaı qurylǵylar birden baılanystan ajyratylady.
Qalaı tirkeımiz?
Jańa qurylǵyny satyp alar aldynda azamattar IMEI-kodyn kz-imei.kz portalynda nemese egov.kz saıtynda teksere alady. Bul – qoldan jasalǵan nemese urlanǵan telefondardy satyp alýdyń aldyn alady. Eger qurylǵy “sur tizimge” tússe, ıesi ony 30 kún paıdalana alady. Osy merzimde baılanys operatorlary qurylǵyny verıfıkasıalaý qajettigi týraly SMS-habarlamalar jiberedi.
Shetelde satyp alynǵan qurylǵyny tirkeý kezinde paıdalanýshy shekaradan ótken kúnin kórsetýi tıis.
IMEI-kodtyń verıfıkasıadan ótý mártebesin onlaın rejımde kz-imei.kz nemese egov.kz portaldarynan teksere alady.
Telefondy shetelden basqa adamǵa berý maqsatynda ákelgen jaǵdaıda da, ony sońǵy paıdalanýshyǵa tapsyrǵanǵa deıin mindetti túrde verıfıkasıa júrgiziledi. Bul rásimdi oryndaý úshin qurylǵynyń ákelinýiniń zańdylyǵyn rastaıtyn qujattar (kedendik deklarasıa nemese shekaradan ótkenin rastaıtyn anyqtama) talap etiledi.
Telefondy IMEI kody boıynsha verıfıkasıalaý tártibi
Aldymen egov.kz portalyna nemese kz-imei.kz saıtyna kiresiz.
Qandaı qujattar qajet:
Jeke kýálik (JSN mindetti túrde);
Elektrondy sıfrlyq qoltańba (ESQ);
Telefonnyń barlyq IMEI-kodtary (*#06# terip nemese qaptamadan kórýge bolady);
Qazaqstanǵa zańdy kirgizilgenin rastaıtyn qujattar: kedendik deklarasıa nemese shekaradan ótkenin rastaıtyn anyqtama.
Saıtqa kirip, arnaıy formany toltyryp, IMEI kodtaryn engizesiz. Sodan keıin qujattardy elektrondy túrde qosa tirkeısiz.
Eskertý. Eger qurylǵyǵa qatysty eshbir qujat bolmasa, tek jeke kýálikpen tirkeý múmkin emes. Mindetti túrde Qazaqstanǵa zańdy kirgizilgenin dáleldeıtin qujat talap etiledi.
Verıfıkasıadan ótpegen qurylǵylar aldymen 30 kún boıy “sur tizimde” bolady. Eger osy merzimde tirkeý júrgizilmese, qurylǵy “qara tizimge” engiziledi. Qara tizimdegi qurylǵylar úshin baılanys qyzmetteri (qońyraý, SMS, mobıldi ınternet) tolyq shekteledi, - delingen mınıstrliktiń resmı jaýabynda.
Kómek alý úshin Kz-imei.kz portalyndaǵy tehnıkalyq qoldaý qyzmetine júginý qajet. Máseleni sıpattap, skrınshottardy qosa tirkeý kerek. Ótinishterdi qarastyrý 1-den 5 jumys kúnine deıin ýaqyt alady.
Mınıstrlik bolashaqta qıyndyq bolmas úshin IMEI-i tirkelgen jáne resmı tekseristen ótken telefondardy satyp alýǵa keńes beredi.