İM júıesinde bakalavrıat baǵdarlamasy boıynsha kýrsanttardy daıarlaıtyn tórt joǵary oqý orny jumys isteıdi, dep habarlaıdy Almaty-akshamy.kz.
"Mınıstrliktiń joǵary oqý oryndaryna ishki ister organdarynyń qyzmetkerlerine qoıylatyn talaptarǵa saı keletin, áskerı qyzmetke jáne oqýǵa densaýlyǵy jaramdy jastar qabyldanady. Oqýǵa tapsyrý úshin maýsym aıyna deıin polısıa bólimderiniń kadr qyzmetine, turǵylyqty jeri boıynsha qylmystyq-atqarý júıesi departamentine nemese oqý ornynyń saıtyna ótinish qaldyrý qajet. Sondaı-aq medısınalyq jáne psıhofızıologıalyq kýálandyrýdan, polıgrafta tekserýden ótý kerek. Ulttyq biryńǵaı testileýde keminde 50 bal jınaý kerek. Matematıka men oqý saýattylyǵynan keminde úsh bal jáne basqa pánder boıynsha keminde bes bal bolýy tıis. Osylardan keıin ǵana İİM joǵary oqý ornyndaǵy konkýrsqa qatysa alasyz", – dedi brıfıńte departament bastyǵy – İİM resmı ókili Shyńǵys Alekeshev.
Spıker İİM joǵary oqý oryndarynda oqýdyń artyqshylyqtaryna da toqtaldy.
"Kýrsanttar memlekettik tapsyrys negizinde bilim alady. Tegin tamaqpen, jatyn ornymen qamtamasyz etiledi. Tegin medısınalyq qyzmet kórsetiledi. Oqý oryndarynda jattyǵý jáne sport zaldary qarastyrylǵan. Stıpendıa alady. Oqý merzimi áskerı qyzmet ótkerýmen teńestiriledi. Eń bastysy túlekter 100% jumyspen qamtylady. Oqý aıaqtalǵannan keıin “polısıa leıtenanty” sheni beriledi", – dedi Shyńǵys Alekeshev.