Akademıanyń 65 jyldyq tarıhy bar.
QR İİM Maqan Esbolatov atyndaǵy Almaty akademıasynyń basshysy, polısıa polkovnıgi Aıdar Saıtbekov alǵash ret Óńirlik komýnıkasıalar qyzmeti alańynda ótken brıfıńke qatysty. Ol ishki ister organdarynyń júıesinde mamandardyń qalaı daıyndalatynyn aıta otyryp, mektep túlekterin oqý ornyna túsýge shaqyrdy, dep habarlaıdy Almaty-akshamy.kz.
Qazaqstan Respýblıkasy İshki ister mınıstrliginiń Maqan Esbolatov atyndaǵy Almaty akademıasy – ǵylym, bilim jáne quqyq qorǵaý salasyndaǵy ozyq tájirıbeni tıimdi biriktirgen jańa býyn akademıasy.
«Bizdiń akademıanyń 65 jyldyq tarıhy bar. Oqý ornynyń jyldar boıy basty maqsaty - qylmysqa qarsy tótep bere alatyn kásibı mamandardy daıyndaý», - dep habarlady A.Saıtbekov.
Búginde akademıanyń túlekteri arasynda ataqty ǵalymdar, generaldar, iri aımaqtyq quqyq qorǵaý organdarynyń basshylary, memlekettik nagrada ıegerleri barshylyq. Bul jerdegiler, ásirese, ártúrli laýazymdarda qyzmettik mindetterin abyroımen adal atqaryp júrgen túlekterin erekshe maqtan tutady.
Akademıada oqytý úsh tilde júrgiziledi, bul Qazaqstannyń quqyq qorǵaý organdaryna suranysqa ıe, halyqaralyq standarttarǵa saı mamandardy daıyndaýǵa múmkindik beredi.
«Kásiptik daıarlaý fakúltetinde Infokommýnıkasıalyq tehnologıalar, krımınaldyq polısıa, uıymdasqan qylmysqa qarsy is-qımyl, kıberqylmystar, esirtki bıznesi men ekstremızmge qarsy mamandyqtar jáne IT-krımınalıster salasy boıynsha joǵary bilimdi mamandardy daıarlaý júzege asyrylady», - dep jalǵastyrdy polkovnık.
Atalǵan oqý prosesine oqytýshylardan bólek, jetekshi ǵalymdar, halyqaralyq sarapshylar men tájirıbeli qyzmetkerler jáne qoǵam belsendileri tartylǵan. Qazirgi jáne bolashaq mamandar men qyzmetkerlerdi ınternet arqyly jasalatyn qylmystarmen kúresý, qylmystyń aldyn alý úshin oqytatyn Kıber qaýipsizdik jáne aqparattyq kafedranyń bazasynda kıber laboratorıa jumys jasaıdy.
Árıne, bolashaq polısıa qyzmetkerleriniń fızıkalyq jáne jaýyngerlik daıyndyǵyna kóp kóńil bólinedi. Sport seksıalary (jattyǵý jáne kúres zaldary, sondaı-aq olımpıadalyq standarttarǵa sáıkes keletin boks rıngi) kýrsanttarǵa fızıkalyq turǵydan odan ári damýǵa múmkindik beredi. Sonymen qatar, Akademıada AJÁEJ ofıserlerin daıarlaýdyń avtorlyq baǵdarlamasy ázirlengen.
Bilim berý prosesinde kitaphananyń alatyn orny erekshe. Qazir bul jerdiń kitaphanasynda 300 myńnan asatyn kitap qory bar. Sonymen qatar, oqý prosesiniń barysynda turaqty negizde mádenı sharalar uıymdastyrylyp turady.
«Sheteldik tájirıbeni zerdeleı otyryp, biz úzdiksiz bilim berýge kóshtik, ıaǵnı, Akademıada qazirgi qyzmetkerler, onyń ishinde basshylyq quram qaıta daıarlaýdan ótedi. Joǵary oqý ornynan keıin «Magıstratýra» jáne «Doktorantýra» baǵdarlamalary boıynsha bilim alýǵa bolady.
Kelesi oqý jylynda Akademıa bakalavrıatqa konkýrstyq negizde qabyldaý jarıalaıdy.
Oqýǵa túsý úshin úmitkerler orta bilimdi bolý kerek. Jas mólsheri - 16 jastan 25 jasqa deıingi QR azamattary qabyldanady jáne oqýǵa túsý týraly barlyq suraqtar men málimetterdi jergilikti polısıa departamentterinen nemese tikeleı İİM Almaty akademıasynan bilýge bolady.
Bolashaq úmitker medısınalyq komısıadan ótýi tıis, fızıkalyq daıyndyǵy jóninde synaq tapsyrǵan bolýy kerek jáne UBT nátıjesi 50 baldan tómen bolmaýy qajet.
Qazaqstan Respýblıkasy İshki ister mınıstrliginiń Almaty akademıasynda oqý tegin, jaıly jataqhanada turý qamtamasyz etilgen. Sondaı-aq oqýdyń artyqshylyqtarynyń qatarynda tegin tamaq, formalyq kıim, medısınalyq qyzmet kórsetý; turǵylyqty jerine deıin (poıyzben) jáne keri júrý. Kýrsanttar shákirtaqy alady. Oqý merzimi merzimdi áskerı qyzmet ótkerýmen teń. Tolyq oqý kýrsyn aıaqtaǵan árbir túlekke jumysqa turýǵa kepildik beriledi.
Oqýdy aıaqtaǵannan keıin túlekterge «Ulttyq qaýipsizdik jáne áskerı is» jáne «Aqparattyq-kommýnıkasıalyq tehnologıalar salasyndaǵy bakalavr» mamandyqtary boıynsha memlekettik úlgidegi dıplom men polısıa leıtenanty sheni qosa beriledi.