3–7 maýsym aralyǵynda Mınsk qalasynda «Belagro-2025» atty 35-shi halyqaralyq mamandandyrylǵan kórme ótti.
Aýyl sharýashylyǵy, sıfrlandyrý, agrotehnologıalar jáne agroınjınırıng salasyndaǵy ozyq sheshimder almasýǵa arnalǵan bul mańyzdy salalyq sharaǵa 14 elden 545-ten astam kompanıa men 200 myńnan astam adam qatysty, dep habarlaıdy aqshamnews.kz.
Qazaqstan atalǵan kórmege Aýyl sharýashylyǵy mınıstrligi men Soltústik Qazaqstan oblysy ákimdiginiń qoldaýymen uıymdastyrylǵan «AgroSHOS» arnaıy ekspozısıasy aıasynda qatysty. Qazaqstan delegasıasyn QR ASHM Agroazyq-túlik naryqtary jáne aýyl sharýashylyǵy ónimderin qaıta óńdeý departamentiniń dırektory Sáýle Jurynova bastap bardy.
Ekspozısıada otandyq agrarlyq ónimderdiń 40-qa jýyq ataýy usynyldy — kúnbaǵys jáne saflor maıy, et jáne sút ónimderi, kondıterlik buıymdar men qaıta óńdelgen aýyl sharýashylyǵy taýarlary. Qatysýshylar qatarynda elimizdiń jetekshi kásiporyndary, Qazaqstannyń maıly daqyldardy qaıta óńdeýshilerdiń ulttyq qaýymdastyǵy, 35-ten astam sút ónimin shyǵaratyn Soltústik Qazaqstan oblysynyń iri aýyl sharýashylyǵy kásiporny «Zenchenko ı K» KT, maı, qaımaq, irimshik óndiretin «Eurasian Milk» kompanıasy, shoshqa ósirý jáne et ónimderin Lecker brendimen óndiretin «EMC Agro» JSHS, TMD jáne Ortalyq Azıa elderine un men makaron ónimderin eksporttaýshy «Sultan-EMMK» AQ, joǵary proteındi mal azyǵy qospalaryn shyǵaratyn «SK Proteın» JSHS, tolyq sıkldi et óńdeý kásiporny «Kazmásoprodýkt» JSHS jáne basqa da kompanıalar boldy.
Kórme barysynda qazaqstandyq ónimder joǵary baǵalanyp, bul elimizdiń agroónerkásiptik kesheniniń halyqaralyq deńgeıdegi básekege qabilettiligin kórsetti. QR ASHM belsendi qatysqany jáne agrosaladaǵy jetistikteri úshin kórmeniń altyn medalimen marapattaldy.
İs-shara aıasynda «AgroSHOS» forýmy ótti, onyń taqyryby — «SHYU elderiniń azyq-túlik qaýipsizdigin qamtamasyz etý». Onda delegasıa músheleri elimizdiń óńirlik azyq-túlik turaqtylyǵyna qosqan úlesi týraly baıandama jasady.
Belarýs Aýyl sharýashylyǵy mınıstrligi ókilderimen ekijaqty kezdesýler barysynda sút-taýarly fermalar salý, ǵylymı zertteýler júrgizý syndy birlesken jobalar talqylandy.
«Belagro-2025» kórmesine qatysý qazaqstandyq aýyl sharýashylyǵy ónimderin syrtqy naryqqa ilgeriletý, jańa iskerlik baılanystar ornatý jáne AÓK-tiń eksporttyq áleýetin arttyrý jolyndaǵy mańyzdy qadam boldy. Kórme Qazaqstannyń agrarlyq bastamalaryna halyqaralyq qoǵamdastyqtyń joǵary qyzyǵýshylyǵyn taǵy bir márte dáleldedi.