10 tamyz qazaq halqynyń uly aqyny, oıshyly ári aǵartýshysy Abaı Qunanbaıulynyń týǵan kúnine oraı Almaty qalasynda birqatar rýhanı-mádenı is-sharalar ótip jatyr. Búgin, 10 tamyzdaǵy mádenı-rýhanı sharalar legi Abaı eskertkishine taǵzym etip, gúl shoqtaryn qoıýdan bastaldy. Dástúrli shara qala ortalyǵyndaǵy Abaı alańynda uıymdastyryldy.
Sharaǵa zıaly qaýym ókilderi, qala ákimdigi, Máslıhat depýtattary, qoǵamdyq keńes músheleri, belsendi jastar men qala turǵyndary qatysty. Jınalǵan qaýym aqyn rýhyna taǵzym etip, eskertkishke gúl shoqtaryn qoıdy.
Shara aıasynda N.Tilendıev atyndaǵy Memlekettik akademıalyq fólklorlyq-etnografıalyq «Otyrar sazy» orkestriniń súıemeldeýimen jınalǵan jurt Uly Abaıdyń rýhy aldynda bas ıip, onyń óshpes murasyn taǵy bir eske alý maqsatynda «Kózimniń qarasy» ánin shyrqady.
Abaı Qunanbaıuly – qazaq ádebıeti men rýhanıatynyń shamshyraǵy. Onyń qaldyrǵan mol murasy men danalyqqa toly oı-tolǵaýlary búgingi qoǵam úshin áli de ózekti. Bul kún – tek aqynnyń týǵan kúnin eske alý ǵana emes, ulttyń rýhanı jańǵyrýyna baǵyttalǵan mańyzdy beles.
"Abaıdy tanýymyz jyl saıyn tereńdep keledi, biz jyl saıyn Abaıǵa jaqyndap kele jatyrmyz. 180 jyldyq Qazaqstannyń túkpir-túkpirinde, onyń ishinde altyn shahar – Almatyda aıryqsha atalyp jatyr. Biz Abaıdy tanyǵan saıyn halqymyzdy tanyp qana qoımaı, jurtymyzdyń kemshiligin kóremiz. Búgingi Almaty qalasynyń ákimdigi soǵan jaǵdaı jasap otyr. Qurmetti qaýym, Abaı toıy qutty bolsyn, bul mereıtoı tarqamasyn", – dedi jazýshy, Qazaqstannyń eńbek sińirgen qaıratkeri Smaǵul Elýbaı.
Saıran JANTÓREEVA, «Grand Ana» tobynyń jetekshisi:
"Búgin keremet mereke! Abaı atamyzdyń 180 jyldyǵyn toılap jatyrmyz. Bul bizdiń qatysyp otyrǵan úshinshi is-sharamyz. Sharanyń uıymdastyrylýy óte joǵary deńgeıde! Qazaq jastaryna úlgi bolý úshin búgin mine, qazaqı naqyshta kıindik", – dedi.
Qala jurtshylyǵy belsendi túrde Abaı mereıtoıyn atap ótýde. Búgin Abaı alańyna 5000-ǵa jýyq adam jınalyp, hakimniń ánin shyrqady. Rýhanı shara eldiń eńsesin bıiktetip, Abaı amanatyn qaıta oı eleginen ótkizýge múmkindik bergeni anyq.