Bul keńestiń jumysy arnaıy zańmen aıqyndalǵan.
Ǵylym jáne joǵary bilim mınıstrligi janynan Qoǵamdyq keńes quryldy. Onyń quramyna Parlament depýtattary, memleket jáne qoǵam qaıratkerleri, ǵalymdar, oqytýshylar, azamattyq qoǵam jáne BAQ ókilderi kirdi, dep habarlaıdy Almaty-akshamy.kz QazAqparatqa silteme jasap.
Ǵylym, joǵary bilim jáne til saıasaty máseleleri jónindegi qoǵamdyq keńestiń alǵashqy otyrysyna mınıstr Saıasat Nurbek qatysyp, vedomstvonyń aldaǵy josparlaryna toqtaldy.
«Jańadan qurylǵan mınıstrliktiń aldyna Memleket basshysy úlken mindetter qoıyp otyr. Ǵylym men joǵary bilim salasyna qatysty barlyq sheshimderdi ózderińizdiń talqylaýlaryńyzǵa usynamyz. Sebebi Qoǵamdyq keńestiń jumysy arnaıy zańmen aıqyndalǵan. Quzyreti de joǵary. Jurtshylyqtyń, azamattyq qoǵamnyń pikirin eskerip, bizge qoldaý kórsetedi dep senemiz», – dedi mınıstr.
Otyrysqa Qoǵamdyq keńestiń 17 múshesiniń 11-i oflaın, 6-ýy onlaın qatysty. Daýys berý arqyly ǵylym jáne joǵary bilim salasynda, sondaı-aq qoǵamdyq keńes jumysyn júrgizýde tájirbıesi mol qoǵam qaıratkeri Serik Yrsalıev Qoǵamdyq keńes tóraǵasy bolyp saılandy.
Mınıstrliktiń salalyq baǵyty eskerilip, 5 komısıa quryldy. Olardyń tóraǵalary saılandy.
- Normatıvtik-quqyqtyq aktilerdiń jobalaryn qaraý jáne sybaılas jemqorlyqqa qarsy is-qımyl máseleleri boıynsha komısıa tóraǵasy bolyp «D. Serikbaev atyndaǵy Shyǵys Qazaqstan tehnıkalyq ýnıversıteti» komersıalyq emes aksıonerlik qoǵamynyń ǵylymı keńesshisi Jasulan Shaımardanov;
- Búdjet máseleleri boıynsha komısıa tóraǵasy bolyp QR Parlamenti Májilisiniń depýtaty Irına Smırnova;
- Ǵylym máseleleri boıynsha komısıa tóraǵasy bolyp «QazBioPharm» Ulttyq holdıńi» aksıonerlik qoǵamynyń basqarma tóraǵasy Kúnsulý Zakarıa;
- Joǵary bilim máseleleri boıynsha komısıa tóraǵasy bolyp azamattyq qoǵam ókili Amantaı Nurmaǵambetov;
- Til saıasaty máseleleri boıynsha komısıa tóraǵasy bolyp QR Parlamenti Májilisiniń depýtaty Maqpal Tájmaǵambetova saılandy.
Jıyn sońynda 3 jylǵa saılanǵan Qoǵamdyq keńestiń tóralqasy bekitildi.