Jetisý aýdanynyń ákimi Gúlnar Kókebaeva Óńirlik komýnıkasıalar qyzmetiniń brıfıńinde aýdandaǵy medısınalyq uıymdardyń, mektepter men balabaqshalardyń qurylysy týraly aıtyp berdi, dep habarlaıdy Almaty-akshamy.kz.
Spıkerdiń aıtýynsha, aýdanda «Shetsiz qala» baǵdarlamasy júzege asyrylýda, basqasha aıtqanda, ár shaǵynaýdanda bilim berý, medısına nysandary, belsendi demalys oryndary bolady.
«Búginde Kókjıek, Qulager jáne Aınabulaq shaǵynaýdandarynda barlyǵy 3 emhana 124 myń adamǵa densaýlyq saqtaý qyzmetin kórsetedi, qalǵan 50 myń turǵynǵa shaǵyn ýchaskelerge baılanysty kórshi aýdandardyń emhanalarynda qyzmet kórsetiledi. Memlekettik emhanalardaǵy eń ótkir jetispeýshilik Kemel shaǵynaýdanynda, Saıahat avtovokzaly aýdanynda jáne jumysshy poselkesi turǵyn alabynda sezilýde», - dedi G.Kókebaeva.
Osy túıtkildi máseleni sheshý úshin Kemel shaǵynaýdanynda kúnine 200 kelýshige arnalǵan otbasylyq-dárigerlik ambýlatorıanyń qurylysy júrgizilýde. Sonymen qatar, Saıahat aýdanynda 1 647 sh.m quraıtyn bolashaq emhana úshin ǵımarat satyp alyndy, qazirgi ýaqytta kúrdeli jóndeý jáne emhanaǵa qaıta jabdyqtaý úshin JSQ ázirlenýde.
Qulager shaǵynaýdanyndaǵy jalpy aýdany 1 967 sharshy metr qoldanystaǵy emhanany keńeıtý úshin úsh qabatty ǵımaratty kúrdeli jóndeýge JSQ ázirleý úshin qosymsha konkýrs ótkiziledi.
Aýdan ákimi oqýshy oryndarynyń tapshylyǵy máselesin sheshý týraly egjeı-tegjeıli toqtaldy. Jetisý aýdanynda 21 memlekettik mektep bar, onda 28 525 oqýshy oqıdy, jalpy jobalyq qýattylyǵy 18 381 oryndy quraıdy.
«Oqýshylar oryndarynyń sanyn arttyrý úshin aýdanda 1050 oryndyq úsh mektepke japsarjaı qurylysy aıaqtaldy. Osynyń arqasynda oqýshy oryndarynyń tapshylyǵy 1,6 myń orynǵa deıin azaıdy», - dedi G. Kókebaeva.
300 oryndy №148 mektep-gımnazıasynda, 300 oryndy № 112 jalpy bilim beretin mektebinde jáne 200 oryndy № 103 mektep-gımnazıasynda qosalqy nysan salý arqyly úsh mektepti keńeıtý josparlanýda.
Mektepke deıingi bilim berýge qatysty Gúlnar Kókebaeva Aınabulaq shaǵynaýdanynda balabaqshaǵa qajettilik baıqalatynyn habarlady. Sondyqtan búgingi kúni Aınabulaq-4 shaǵynaýdanynda 160 oryndy balabaqsha qurylysy júrip jatyr. Ony bıylǵy jyldyń jeltoqsan aıynda aıaqtaý josparlanyp otyr.
Ótken jyly Ratýshnyı kóshesinde 280 oryndyq burynǵy balabaqsha ǵımaraty satyp alyndy, ony jyl sońyna deıin ashý josparlanyp otyr.