Elimizdiń ár aımaǵynda ákimdik grantyna ótinim qabyldaý bastaldy, dep habarlaıdy aqshamnews.kz
Ár aımaq qajettiligine qaraı tek kerek mamandyq boıynsha konkýrs jarıalady. Bıylǵy bólingen nysanaly grant sany – 1729. Bul byltyrmen salystyrǵanda bir jarym ese az.
Almaty qalasy men Pavlodar, Qyzylorda, Soltústik Qazaqstan jáne Ulytaý oblystary bul bastamadan qalys qaldy. Astana qalasy ákimdigi 526 grant bólip otyr. Eń azy Qostanaı oblysynda.
Konkýrsqa qatysý úshin úmitker joǵary oqý oryndarynyń qabyldaý komısıasyna ótinish berýi qajet. Suralatyn qujat tizimi: atestat, UBT sertıfıkaty, tólqujattyń kóshirmesi.
Eger jeńildik sanatyna jatatyn bolsa, rastaıtyn qujattar talap etiledi. Qujat qabyldaý merzimi ár ýnıversıtette ártúrli bolýy múmkin. Qosymsha aqparatty ákimdik saıtynan qaraýǵa bolady. Taǵy bir qosa ketetin aqparat, ákimdik granty – nysanaly bolǵandyqtan, túlek oqýyn aıaqtaǵan soń sol óńirge baryp, 3 jyl jumys isteýge mindetti.
Rektor granty degen de bar. Ol belsendi, oqý úlgerimi jaqsy, áleýmettik osal toptaǵy otbasynan shyqqan talapkerlerge oqý oryndary tarapynan beriledi. Bıyl mundaı grant sany eki myńnan asady.
Budan bólek, jumys berýshi men joǵary oqý orny arasynda jasalǵan kelisim negizinde jumys berýshiler de arnaıy grant bóledi.
Sondaı-aq "Qazaqstan halqyna" qoǵamdyq qory 500 grant usynyp otyr. Ótinim 17 tamyzǵa deıin qabyldanady. Grant ıegerleriniń tizimi 11 qyrkúıekke deıin jarıalanady.
Tegin oqý múmkindigin usynyp otyrǵandardyń ishinde birneshe jetekshi kompanıa bar. Budan bólek, keıbir talapkerler granttan bas tartýy múmkin. Osy kezde múmkindik kelesi joǵary bal jınaǵan talapkerge beriledi. Onyń nátıjesi qyrkúıek-qazan aıynda belgili bolady. Mundaı múmkindik aqyly bólimde oqıtyn, úlgerimi jaqsy stýdentke de berilmek.