Onyń 25 myńy almatylyq joǵary oqý oryndaryna tapsyrylǵan.
Grant konkýrsyna ótinishter qabyldaý bastalǵaly beri 65 myń ótinish kelip tústi, dep habarlaıdy Almaty-akshamy.kz Ǵylym jáne joǵary bilim mınıstrligine silteme jasap.
Mınıstrliktiń málimetinshe, ótinishterdiń basym bóligi, atap aıtqanda, 25 myńy almatylyq joǵary oqý oryndaryna tapsyrylǵan. Astananyń oqý oryndarynda oqý úshin 12 myń ótinish qabyldansa, 3,5 myń adam Qaraǵandy oblysynyń ýnıversıtetterinde oqýǵa nıet bildirgen.
Talapkerlerdiń tańdaýy ishinde eń kóp suranysqa ıe baǵyttar qatarynda "Pedagogıkalyq ǵylymdar" (17 myń), "Injenerlik, óńdeý jáne qurylys salalary" (12 myń) jáne "Aqparattyq-kommýnıkasıalyq tehnologıalar" (9 myń) qalyp otyr.
Bilim berý baǵdarlamalarynyń tobyna keletin bolsaq, eń kóp ótinish "Aqparattyq tehnologıalar" - 7 myń. Ary qaraı "Dene shynyqtyrý muǵalimderin daıarlaýǵa" - 3,7 myń ótinish kelip túsken. Úshinshi orynda "Medısına", ony 2,8 myń talapker tańdaǵan.
Bilim berý granttaryn taǵaıyndaý konkýrsyna ótinishter qabyldaý 20 shildege deıin júrgiziledi. Qujattardy qabyldaý eGov arqyly onlaın formatta nemese joǵary oqý oryndarynyń qabyldaý komısıalary arqyly oflaın formatta júzege asyrylady. Sondaı-aq, joǵary oqý oryndarynda vırtýaldy qabyldaý komısıasy jumys isteıtin bolady. Qujattardy kez kelgen joǵary oqý oryndary (ornalasqan jeri boıynsha) arqyly tapsyrýǵa bolady.