Aıbyny asqaq Qazaq eli!
Germanıanyń Maındaǵy Frankfýrt qalasynda Qazaqstan Táýelsizdiginiń 30 jyldyǵyna arnalǵan fotokórme ashyldy, dep habarlaıdy Almaty-akshamy.kz.
Ekspozısıada elimizdiń qazirgi zamanǵy sáýlet óneri, ulttyq salt-dástúrleri kórinis tapqan týyndylar usynyldy. Qazaqstannyń kórkem tabıǵaty beınelengen sýretter kópti kórgen saıahatshylardyń ózin tańǵaldyrdy. Keıbireýleri tipten kelesi demalysyn elimizde ótkizbekke sheshim qabyldaǵan.
Hans-Peter Vıllı, Shveısarıanyń Maın Frankfýrttegi konsýlynyń orynbasary bizdiń el týraly áserimen bólisti.
«Elderińiz qandaı alýan túrli! Kólderi de, shólderi de jáne zamanýı qalalary da bar. Buǵan deıin osyny bilmeppin, tek kórmede ǵana búkil sulýlyǵyn kórdim. Endi Qazaqstanǵa barýdy kózdep otyrmyz», - dedi ol.
Ina Haýk, Maındaǵy Frankfýrt magıstratynyń keńesshisi qala atynan qazaqstandyqtardy Táýelsizdiktiń 30 jyldyǵymen quttyqtady.
«Munda sońǵy 30 jylda Qazaqstannyń qalaı damyǵanyn kórýge bolady. Maǵan úlken áser qaldyrdy. Qazaqstanda áli bolǵan emespin, biraq osy keremet elge barǵym keledi. Ǵylym, bilim men bızneste aramyzda tyǵyz yntymaqtastyq ornaǵan. Barlyq salada jumysymyz tabysty bolaryna úmit kóp. Qalamyzdyń atynan qazaqstandyqtardy Táýelsizdiktiń 30 jyldyǵymen quttyqtaımyn».