Instagram qoldanýshylary folgamen oralǵan roýter kórsetilgen vıdeony kórgen bolar . Rolık avtorynyń aıtýynsha, bul qarapaıym ádis Internettiń sapasyn jaqsartýǵa kómektesedi-mis.
Folga shaǵylystyrǵysh qyzmetin atqaryp, sıgnaldy qajet jaqqa baǵyttaıdy, sonymen qatar elektromagnıttik sáýlelenýdi ishinara bloktaıdy eken. Bul ras pa, joq pa ekenin Stopfake.kz anyqtap kórdi, dep habarlaıdy aqshamnews.kz.
Iilgish metal paraqsha týraly konspırologtar kópten beri aıtyp júr. Folgadan jasalǵan bas kıimder esterińizde bolar. Ol mıdy elektromagnıttik sáýlelenýden qorǵaý úshin kıýge usynlǵan edi. Shyndyǵynda, mundaı qasıetterge ıe bas kıimder joq.
Reseıdegi tehnologıalar týraly eń iri jobalardyń biri Hi-Tech Mail pikirinshe, roýterdi folgaǵa oraǵan durys emes.
«Folga birdeńeni buǵattasa da, ol zıandy sáýlelenýmen birge sıgnaldyń ózin de buǵattaıtyn edi», – deıdi sarapshylar.
Sonymen qatar, folgadaǵy elektr jabdyqtarynda tabıǵı salqyndatý bolmaıdy. Qyzyp ketýdiń saldarynan ol isten shyǵady, tipti danyp ketýi de múmkin.
Wi-Fi tehnologıasy 1997 jyly jasalǵan, sodan beri onyń adam densaýlyǵy men qorshaǵan ortaǵa áserine qatysty birneshe ret ǵylymı zertteýler júrgizildi. Alaıda, olardyń eshqaısysy Wi-Fi densaýlyqqa qaýip tóndiretinin rastaǵan joq. Tehnologıa qoldanylyp kele jatqan 27 jylda ol adamdardyń aýrýyna sebep bolǵan emes, sondaı-aq adamdardyń ál-aýqatyna teris áser etken jaǵdaılar tirkelgen joq.
Mamandardyń esepteýinshe, telefonmen sóılesken 20 mınýttyń ishinde adam Wi-Fi-dy bir jyl qoldanǵandaǵy mıkrotolqyndy sáýlelený áserine kóbirek túsedi. Al 20 noýtbýk pen eki roýter birge bir uıaly telefonmen birdeı mólsherde sáýle shyǵarady.
Osylaısha, rýterdi folgaǵa oraý sıgnaldyń sapasyn jaqsartpaıdy, kerisinshe ony buǵattap, qurylǵynyń qyzyp ketýine ákelýi yqtımal. Al Wi-Fi-dan shyǵatyn elektromagnıttik sáýlelenýge keletin bolsaq, buǵan qatysty senimdi ǵylymı dálelder joq.