Jańa platforma Transkaspıı kólik marshrýtyn Eýropany Azıamen 15 kún nemese odan az ýaqyt ishinde baılanystyratyn mýltımodaldy jáne básekege qabiletti baǵytqa aınaldyrý maqsatynda jumys isteıdi
İs-shara Ortalyq Azıa elderiniń jáne dáliz boıynda ornalasqan basqa elderdiń, sondaı-aq halyqaralyq qarjy ınstıtýttary men Eýroodaq quramyna kirmeıtin G7 elderiniń ókilderiniń qatysýymen ótti, dep habarlaıdy Almaty-akshamy.kz.
Kólik mınıstrliginiń basshysy Marat Qarabaevtyń aıtýynsha, kólik ınfraqurylymyn damytý jáne kólik baılanystaryn kúsheıtý óńirlerdiń ekonomıkalyq ósýi men órkendeýi barysynda mańyzdy ról atqarady.
«Úılestirý platformasynyń qurylýy bizge ortaq maqsattarǵa jetý úshin kúshimizdi biriktirýge, tájirıbe men pikir almasýǵa biregeı múmkindik beredi. Bul jumysqa Ázerbaıjan, Armenıa, Grýzıa, sondaı-aq Túrkıadan kelgen áriptesterimiz shaqyrylǵanyn atap ótkim keledi. Bul óz kezeginde Transkaspıı halyqaralyq kólik baǵytyn damytý boıynsha iri jáne turaqty maqsattardy iske asyrý aıasynda mańyzdy ról atqarady», – dep atap ótti vedomstvo basshysy.
Kólik salasyna jaýapty mınıstr qatysýshy elder men uıymdardyń ókilderine biregeı alań qurýǵa qatysyp, qyzyǵýshylyq tanytqandary úshin ári Eýropalyq Odaqqa kórsetilgen qoldaý men Ortalyq Azıa elderin damytýǵa baǵyttalǵan jumysy úshin alǵys bildirdi.
Sóz kezeginde Halyqaralyq seriktestik jónindegi bas dırektorattyń birinshi dárejeli keńesshisi Henrık Hololeı:
«Transkaspıı halyqaralyq kólik marshrýty úshin qurylǵan úılestirý platformasy Ortalyq Azıa men Eýropanyń arasyn jaqyndatýǵa baǵyttalǵan yntymaqtastyǵymyz barysynda alǵa jasalǵan eleýli qadam. Turaqty kólik baılanysy aımaqtyń ekonomıkalyq ósýin jáne onyń Eýropamen baılanysyn nyǵaıtý úshin óte mańyzdy. Biz seriktesterimizge damý jáne qorshaǵan ortany qorǵaý maqsattaryna qol jetkizýde qoldaý kórsetýge nıettimiz», – dedi.
Eýropalyq utqyrlyq jáne kólik komısıasy Bas dırektorynyń orynbasary Maııa Bakran: «Úılestirý platformasy Transkaspıı halyqaralyq kólik baǵytyn Eýropany, Kavkazdy jáne Ortalyq Azıany baılanystyratyn mýltımodaldy jáne zamanaýı baǵytqa aınaldyrýǵa yqpal etedi. Ártúrli múddeli taraptardyń úılestirý áreketteri aımaqtyń turaqty ekonomıkalyq damýyna úles qosady», dep óz oıyn ortaǵa saldy.
Tutastaı alǵanda, platforma atalǵan dálizdiń jumysyn ilgeriletýge jáne Ortalyq Azıadaǵy ınfraqurylym salasyndaǵy basym jobalardy iske asyrý jónindegi kúsh-jigerdi úılestirýge yqpal etetin bolady. Ol sondaı-aq temirjol, jol jáne port ınfraqurylymyna ınvestısıalardy yntalandyrady jáne úılestiredi.
Aıta keterligi, Eýroodaq uzaq ýaqyt boıy óńirdiń senimdi seriktesi bolyp tabylady, sáıkesinshe ınfraqurylymdy jaqsartýǵa jáne ekonomıkalyq baılanystardy nyǵaıtýǵa, turaqty damýdy ilgeriletýge yqpal etedi. Jańadan qurylǵan platforma sheńberinde birlesken jumys tek kólik ınfraqurylymyn jaqsartýǵa ǵana emes, sonymen qatar ekonomıkalyq baılanystardy aıtarlyqtaı nyǵaıtýǵa, kólik dálizderiniń qaýipsizdigi men turaqtylyǵyn arttyrýǵa, sondaı-aq kólik sektorynda ınovasıalar men ozyq tehnologıalardy engizýdi jedeldetýge múmkindik beredi dep kútilýde.