XVI «Eýrazıa» hlyqaralyq kınofestıvali bastaldy! Ashylý saltanaty Abaı atyndaǵy Qazaq ulttyq opera jáne balet teatrynda ótti.
Baǵdarlama qyzyl kilem rásimimen bastaldy. Saltanatty túrde bezendirilgen teatrdyń bas zalynda is-sharany festıvál prezıdenti Ardaq Ámirqulov pen baǵdarlama dırektory Gúlnara Ábikeeva ashty. Qazaqstan Respýblıkasynyń Mádenıet jáne sport mınıstri Dáýren Abaevtyń kirispe sózi oqyldy jáne ol qatysýshylarǵa shyǵarmashylyq jetistikter men jemisti kún, jaqsy kóńil-kúı tiledi.
«Eýrazıa» baıqaý baǵdarlamalaryna qatysatyn barlyq fılmderdi qamtıtyn treıler de kórsetildi. Oǵan qosa, kórermender qazylar alqasynyń múshelerimen tanysty. Bir qyzyǵy, sahnaǵa shyqqan sheteldik qonaqtar aldymen qazaq tilinde kem degende bir-eki sóz aıtýǵa tyrysty.
Saltanatty sharanyń basty tosynsyıy festıváldiń arnaıy júldelerin tabystaý boldy. «Ortalyq Azıa kınematografynyń damýyna qosqan úlesi úshin» júldesin ataqty ózbek rejıseri Álı Hamraev aldy, ol osy festıválde halyqaralyq baıqaýdyń qazylar alqasyn basqarady. 85 jastaǵy ózbek kınosynyń sheberiniń jaýaby is-sharadaǵy eń jyly lebizder toly sózder boldy: «Búgin Qazaqstan jerine mereke keldi – álemdik kıno ókilderi Sizdiń shańyraqta qonaqta. Meniń oıymsha, qıyn kezeńde basqa halyqtardy jyly qabyldaı alatyn adamdar keremet! «Eýrazıa» festıvali ómir súredi – bul eń bastysy! Biz ony saǵyndyq. Festıválge jáne Qazaqstanǵa sáttilik!».
Taǵy bir arnaıy syılyq – «Qazaq kınematografyna qosqan úlesi úshin» mádenıettanýshy jáne qoǵam qaıratkeri Murat Áýezovke tabystaldy.
Baǵdarlama ashylý fılminiń, qazaqstandyq kınorejısser Sábıt Qurmanbekovtiń «Boran» kartınasynyń kórsetilimimen aıaqtaldy.
Biraq ashylý saltanatyna deıin festıvál ortalyǵynda alǵashqy baspasóz konferensıalary ótti.
Aldymen jýrnalıserdiń aldynda is-shara uıymdastyrýshylary sóz sóıledi. Gúlnar Ábikeevanyń aıtýynsha, bıylǵy festıválde juldyzdy qazylar alqasy men óte myqty baǵdarlama quryldy. «Eger bir kezderi bizde «Dınamıkalyq damyp kele jatqan qazaq kınosy», sodan keıin «Dınamıkalyq qazaq kınosy» baǵdarlamalary bolsa, qazir bizdiń kınematograf halyqaralyq baıqaýmen teń jeke ulttyq konkýrs ótkizýge múmkindik beretin deńgeıge jetti. XVI «Eýrazıa» kınofestıvaliniń basty ereksheligi men jańalyǵy osy».
Baıqaý baǵdarlamalarynyń joǵary deńgeıiniń dáleli – baıqaýǵa qatysatyn tórt kartınanyń óz elderinen «Oskar» syılyǵyna usynylǵandyǵy. Sonymen qatar, festıválde birden tórt álemdik premera ótedi.
Taǵy úsh baspasóz konferensıasynda ulttyq, halyqaralyq baıqaýlardyń jáne NETPAC (Azıa kınosyn ilgeriletý jónindegi halyqaralyq jeli) qazylar alqasynyń «tusaýkeseri» ótti.
Negizgi is-sharamen qatar Kınopark 10 Forum kınoteatrynda fılm kórsetilimderi bastaldy. Halyqaralyq baıqaýdan «Il Boemo» (Chehıa – Italıa – Slovakıa; rejıser Petr Vaslav) jáne «Áıel» (Qytaı; rejıser Van Chao) fılmderi kórsetildi. Ulttyq baıqaýdan – «Taý pıazy» (rejıser Eldar Shıbanov), «Zere» (rejıser Dáýren Qamshybaev) jáne «Ot» (rejıser Aıjan Qasymbek). Al «Erekshe oqıǵa» konkýrstan tys baǵdarlamasy bolgar rejıseri, ulttyq baıqaýdyń qazylar alqasynyń múshesi Mılko Lazarovtyń «Aga» kartınasymen ashyldy. Ol búkil álem boıynsha kınofestıvalderde kóptegen marapattarǵa ıe boldy, al XIV «Eýrazıa» kınofestıvalinde "Úzdik rejıssýra úshin" júldesine ıe bolǵan.
