Esirtki tasymaldaǵandar qylmysy dáleldense, árqaısysy 15 jylǵa deıin bas bostandyǵynan aıyrylýy múmkin.
Jambyl óńirinen elimizdiń ózge aımaqtaryna turaqty túrde esirtki tasymaldap otyrǵan qylmystyq top músheleri Qaraǵandyda qolǵa tústi, dep habarlaıdy Almaty-akshamy.kz.
Kúdiktilerden 198 keli marıhýana tárkilengen. Olar ony kádimgi qaptarǵa salyp, jaıbaraqat kólikpen tasymaldap júrgen.
Arnaıy operasıa kezinde 3 adam qolǵa tústi. Keıin arnaıy operasıa Almaty men Tarazda jalǵasyp, olardyń taǵy 3 seriktesi ustaldy. Kúdiktilerden qymbat kólikter men myltyqtar tárkilengen.
Zańsyz qadamǵa barǵandar 34 pen 56 jas aralyǵyndaǵy turǵyndar bolyp shyqty.
"Ustalǵandardan 6 mln 435 myń teńge aqsha jáne 87 qapqa salynǵan ósimdik zaty alyndy. Ekspertızaǵa saı, 198 keli marıhýana zaty ekeni belgili boldy. Atalǵan fakt negizinde QR QK 297-babynyń úshinshi tarmaǵy boıynsha qylmystyq is qozǵaldy, tergeý amaldary júrgizilýde", - oblystyq polısıa departamentiniń baspasóz hatshysy Baqytjan Qudıarov.