Búgin «únsizdik kúni».
Osy jazdyń mańyzdy saıası oqıǵasy shildeniń 25-ine belgilendi. Bul kúni buqara 730 aýyl ákimine daýys beredi, dep habarlaıdy Almaty-akshamy.kz 24.kz saıtyna silteme jasap.
«Bul – Prezıdent Qasym-Jomart Toqaev qabyldaǵan mańyzdy qadamdardyń biri. Óıtkeni reforma jergilikti basqarý júıesine qatysty kózqarasty túbegeıli ózgertedi. Iaǵnı aýyl turǵyndary ózderiniń kóńilinen shyǵatyn jáne áleýmettik talaptaryn oryndaı alatyn ákimin tańdaıdy. Sońǵylary da jergilikti halyqtyń qoldaýyna ıe bolsa, ózinen joǵary turǵan aýdan basshysy aldynda da belgili bir saıası salmaqqa ıe bola alady», – deıdi quqyq qorǵaýshy Shyńǵys Lepsibaev.
Aýyl ákimderiniń ókilettik merzimi ózgergen joq. Olar burynǵysynsha 4 jylǵa saılanady. Eskerte keteıik, buryn aýyl, eldi meken nemese aýdan ákimderine kandıdatty qala basshysy usynatyn. Sóıtip, jergilikti máslıhat depýttary daýys berip saılaıtyn edi.