Jańa Qazaqstandy qurý bir sátte iske asa qoımaıdy. Bul - óz kezeginde qoǵamdyq transformasıanyń tereń jáne uzaq prosesi
Memleket basshysy bastama etken saıası reformalar bıyl júzege asyrylady. Bul týraly QR Memlekettik hatshysy Erlan Qarın málim etti, dep habarlaıdy Almaty-akshamy.kz.
«Almatylyqtardy Naýryz meıramymen quttyqtaý kezinde Prezıdent jańa anyqtama – «Ekinshi respýblıka» jaıynda aıtty. Osyǵan baılanysty keıbir sarapshylar bul túsiniktiń astarynda ne jatyr jáne buǵan deıin jarıalanǵan «Jańa Qazaqstan» konseptisine onyń ózara qatysy qandaı dep suraq qoıyp jatyr. Shyn máninde, osy eki ıdeologemanyń máni bir, ıaǵnı tek aksentterinde ǵana aıyrmashylyq bar. Jańa Qazaqstan – ol jalpy bizdiń eldiń bolashaǵynyń obrazy», - dep jazdy Erlan Qarın Telegram kanalynda.
Onyń aıtýynsha, bul turǵyda qoǵamdyq qundylyqtardy jańartý men ulttyń jańa sapasyn qalyptastyrý qajettigi týraly sóz qozǵalyp otyr.
Sáıkesinshe, elimiz qańtar oqıǵasy nemese Joldaýdan keıin birden avtomatty túrde Jańa Qazaqstanda ómir súre bastady degendi bildirmeıdi.
Jańa Qazaqstandy qurý bir sátte iske asa qoımaıdy. Bul - óz kezeginde qoǵamdyq transformasıanyń tereń jáne uzaq prosesi.
«Sonymen birge, Prezıdent Joldaýda saıası reformalardyń jańa basymdyqtaryn jarıalaǵannan keıin, bılik ınstıtýttary arasynda jańa konstıtýsıalyq teńgerimdi qalyptastyrý týraly sóz qozǵalyp otyrǵany kópshilikke túsinikti boldy. Birinshi kezekte ol basqarýdyń sýperprezıdenttik úlgisinen myqty Parlamenti bar prezıdenttik respýblıkaǵa birjola kóshý bastamasyna qatysty. Memleket basshysynyń bıylǵy Joldaýyn júzege asyrý aıasynda Konstıtýsıanyń 30-dan astam babyna ózgeris engizý jáne 20-dan astam zańdy qabyldaý eskerilgen. Bul - reformalardyń óte aýqymdy jospary. Belgilengen jańarýlar saıası júıeniń barsha konfıgýrasıasyn eleýli túrde ózgertedi», - dedi Memlekettik hatshy.
Osy oraıda ol azamattardyń memleketti basqarýǵa qatysýyn keńeıtýge, jańa saıası mádenıetti qalyptastyrýǵa ekpin qoıylyp otyrǵanyn atap ótti.
«Jalpy, tek memlekettik basqarý modelin aýystyrý bastalǵany jaıynda ǵana emes, sonymen qatar memlekettik ári qoǵamdyq paradıgmanyń ózgerýi týraly aıtýǵa bolady. Búginde osy prosesti naqty belgileý úshin Prezıdent «Ekinshi respýblıka» anyqtamasyn paıdalandy. Buǵan qosa, Ekinshi respýblıka – ol ábden jaqyn ári aıtarlyqtaı sezilip turǵan maqsat. Sebebi Memleket basshysy bastama etken saıası reformalardy júzege asyrý osy jyldyń ishinde josparlanǵan. Jańa Qazaqstan – qoǵam men ulttyń jańarýy bolsa, al Ekinshi respýblıka – memlekettik úlginiń jańarýy», - dep túsindirdi Erlan Qarın.