Almatyda "Osobennyı doktor" ınklúzıvti serıalynyń ekinshi serıasynyń tusaýkeseri ótti.
Daýn sındromy bar balalar Qazaqstan fılminde basty róldi somdady, dep habarlaıdy Almaty-akshamy.kz
Erekshe detektıvti mını-serıalda basty rólderdi qazaqstandyq kıno juldyzdarymen qatar, Daýn sındromy bar balalar somdaıdy.
"Osobennyı doktor" qysqametrajdy fılminiń túsirilimi Almaty men Astana qalalarynda ótti. Oǵan tanymal otandyq ártister Azız Beıshenalıev pen Galına Tabala qatysqan. Sondaı-aq kartınadaǵy basty rólderdiń birin Daýn sındromy bar Marta Permınova somdady. Fılmdi onyń ata-anasy – rejıser, senarıst jáne prodúser Sofıa Vıtver jáne kompozıtor Sergeı Permınov túsirdi.
Qazaqstandyq kórermender qysqametrajdy fılmdi zor yqylaspen qabyldady. Túsirilim toby óz týyndylarynan shabyt alyp, jumystaryn jalǵastyrý týraly sheshim qabyldady. Osylaısha, kásibı akterlar men Daýn sındromy bar balalardyń qatysýymen mını-serıal túsirý ıdeıasy paıda boldy.
Ekinshi serıa Almaty men onyń mańynda túsirildi. Birinshi serıanyń basty juldyzy Marta Permınova bul joly túsirilimge qatyspady, biraq alańda júrip, barlyq oqıǵalardyń kýási boldy. Jańa lentada onyń dostary – Daýn sındromy bar Damır men Arlan boı kórsetti.
Sonymen qatar bul joly komandaǵa Qazaqstannyń Halyq ártisi Tatána Tarskaıa, belgili qazaqstandyq ártister – Alekseı Shemes, Shyńǵys Qapın, Karına Volkova, Orynbasar Tazabekov, Artem Gansev qosyldy.
Rejıser Sofıa Vıtver ekinshi serıanyń tusaýkeseri aldynda Daýn sındromy bar balalardyń basqa akterlar sekildi senarı boıynsha oınamaıtynyn eskertti. Aıtýynsha, olardyń ekrandaǵy sózderin senarıster jazbaǵan. Balalar kartınada ártistermen óz betinshe qarym-qatynas jasap, óz qalaýlary boıynsha áreket etedi.
Halyq ártisi Tatána Tarskaıa keıipkerdiń anasyn, demensıamen aýyratyn adamdy somdaıdy. Rejıser ártúrli jastaǵy erekshe adamdardy kórsetkisi kelgen.
Sondaı-aq Sofıa Vıtver túsirilimniń qarjylyq máselesin de aıtyp ótti.
"Mádenıet mınıstrligi kómektesti – aqshamen emes, aparatýramen. Men ózimniń barlyq resýrstarymdy paıdalandym. Múddeli adamdar kómektesedi. Biz bárin derlik túsirip boldyq, taǵy eki túsirilim kúnin uıymdastyrý qaldy. Sonymen qatar, 3-4 serıanyń montajyn jasaımyz", – dep bólisti rejıser.
Onyń aıtýynsha, 3 jáne 4 serıanyń túsirilimderi men montajy aıaqtalǵannan keıin týyndy teledıdar men platformalarǵa usynylady.
"Eger serıal Qazaqstanda osyndaı formatta qabyldansa, jazda shyǵýy múmkin. Sondaı-aq kúzge qaraı men ony tolyq metrge qaıta montajdaýdy josparlap otyrmyn. Bul oı iske assa, fılm kúzde tolyq metr retinde shyǵýy múmkin", – deıdi rejıser.
Psıholog jáne kognıtıvti psıhoterapevt Vıktorıa Levınanyń aıtýynsha, atalǵan fılmniń arqasynda jas ártister de, olardyń ata-analary da mańyzdy tájirıbege ıe boldy.
"Daýn sındromy bar balalar ata-analaryn aınaladaǵy adamdardyń pikirine tózimdi ári ol pikirlerden táýelsiz bolýǵa úıretedi. Kópshiliktiń kóńil-kúıine jáne jalpy qabyldanǵan normaǵa beıim bolǵandy bildiretin "konformızm" degen uǵym bar. Adamdardyń birtúrli nemese tańǵalyspen qaraýlaryna tótep berý – óte qıyn mindet. Mundaı jaǵdaıda bastysy – agresıaǵa berilmeý. Biz balamyzdy sol kúıi – fızıologıalyq damýdyń, oılaýdyń kidirýimen qabyldaı otyryp, onyń ózgesheligin de qabyldaımyz. Bul arqyly ata-analar tózimdirek bola túsedi. Daýn sındromy bar balalar ata-analaryn osy álemniń barlyq alýan túrliligin qabyldaýǵa úıretedi. Mundaı balanyń damýy onyń qorshaǵan ortasyna baılanysty. Olar táýelsiz bola alady. Ata-analar 6-7 jasynan bastap balany eńbekqor, bastamashyl etip tárbıeleýi kerek. Ol ózin tolyqqandy sezinýi qajet. Shamadan tys aıaýshylyq tanytýǵa bolmaıdy", – dep atap ótti Vıktorıa Levına.