Qazaqstan álemdik týrısik kartadaǵy óz pozısıasyn nyǵaıtyp keledi.
Bedeldi halyqaralyq Bloomberg basylymy Almaty qalasyn 2026 jyly barýǵa turarlyq álemdegi eń úzdik 25 týrısik baǵyttyń tizimine engizdi, dep habarlaıdy Aqshamnews.kz.
Bloomberg Almaty qalasynyń týrısik tartymdylyǵynyń turaqty ósimin jáne onyń jyl boıy suranysqa ıe baǵyt ekenine nazar aýdarady. Onyń ishinde qalalyq mádenıet, baı tarıhı mura, gastronomıa jáne tabıǵı landshafttarǵa jaqyndyǵy kórsetiledi.
«Ortalyq Azıa dalasynda shyǵarmashylyq energıa qaınap jatyr. Eldiń eń iri qalasynyń tanymaldyǵy artyp keledi jáne 2025 jyldyń 9 aıynda rekordtyq 2,5 mıllıon adam bolǵan. Keıbiri altyn kúmbezdi Zenkov soboryn, dámdeýishter, bal jáne jylqy etinen jasalǵan shujyqtar satylatyn Jasyl bazardyń saýda qatarlaryn kórý úshin keledi. Basqalary qalanyń beton qurylysy artynda menmundalaıtyn İle Alataýy taýlaryndaǵy Alpi kólderi men taý shańǵysy betkeılerine qaraı bet alady», - dep jazady basylym.
Bloomberg Almatydaǵy demalystyń maýsymdyq ártúrliligine erekshe nazar aýdarady. Qys mezgilinde týrıserge Shymbulaqtyń taý betkeılerine barý usynylady.
«Bloomberg nusqasy boıynsha Qazaqstannyń álemdegi eń úzdik 25 týrısik baǵyttyń qataryna engizilýi - mańyzdy halyqaralyq moıyndaý jáne qalanyń tanymaldyǵyn arttyrý boıynsha Visit Almaty jumysynyń nátıjesi bolyp tabylady. Bul eldiń jahandyq týrısik naryqtaǵy básekege qabilettiliginiń, halyqaralyq aýdıtorıanyń Qazaqstanǵa qyzyǵýshylyǵynyń artqanyn kórsetedi. Sońǵy jyldary elimiz jetekshi álemdik BAQ reıtıńterinde jıi enýde», - dep atap ótti «Kazakh Tourism» UK» AQ Basqarma tóraǵasynyń m.a. Danıel Serjanuly.
Bloomberg jyl saıynǵy reıtıńi týrısik trendterdi saraptaý, sala jańalyqtaryn týrızm salasyndaǵy sarapshylarmen taldaýy negizinde qalyptastyrylady.