Qaraǵandy oblysyndaǵy bírqatar medıtsınalyq nysandy júzege asyruǵa Arnauly memlekettík qordan shamamen 7,5 mlrd teńge bólíndí.
Atap aıtqanda, Qaraǵandydaǵy jańa onkologıyalyq ortalyqtyń operatsıyalyq-reanımatsıyalyq blogyn zamanauı jabdyqtarmen jaraqtandyruǵa 6,2 mlrd teńge bólíndí. Oblystyq byudjetten qosymsha 1,74 mlrd teńge kólemínde bírlesíp qarjylandyru kózdelgen. Qazírgí uaqytta nysannyń daıyndyǵy 70%-ǵa jettí, íshkí árleu jūmystary júrgízílude.
Balqash qalasynda qazírgí uaqytta kúrdelí jóndeu júrgízílíp jatqan kópbeıíndí auruhana bazasynda audanaralyq medıtsınalyq hab qūrylady. Būl maqsattarǵa 1 mlrd teńgeden astam qarjy bólíndí, jalpy qūny 1,27 mlrd teńgení qūraıdy. Joba ayasynda angıografıyalyq operatsıyalyq jáne qabyldau-dıagnostıkalyq bólímshelerdí ornalastyru úshín qosymsha korpustyń qūrylysy ayaqtaluda. Búgíngí tańda nysan 96%-ǵa daıyn. Sondaı-aq qańqany salu, ınjenerlík jelílerdí tóseu jáne íshkí árleu boıynsha negízgí jūmystar ayaqtaldy. Nysandy osy jyldyń sońyna deıín tapsyru josparlanǵan.
Sonymen qatar Balqashta balalardy ońaltu ortalyǵy qūrylyp jatyr: būrynǵy sanatorıı ǵımaratyn qaıta jabdyqtau úshín 272,1 mln teńge baǵyttaldy. Joba statsıonar jáne ambulatorıyalyq qabyldaudy ūıymdastyrudy kózdeıdí. Reabılıtologtardy, nevropatologtardy, logopedterdí jáne EDSh nūsqaushylaryn qosa alǵanda, tar beıíndí mamandardan tūratyn kópsalaly komanda qūrylady. Būl balalarǵa oblys ortalyǵyna barmaı-aq sapaly ońaltuǵa qol jetkízudí qamtamasyz etedí. Jūmystardy ayaqtau 2026 jyldyń aqpan aıyna josparlanyp otyr.
Osy jobalardy júzege asyru óńírdegí medıtsınalyq kómektíń sapasyn arttyrady. Osylaısha, angıografıyalyq operatsıyalyq bólímshení íske qosu «altyn saǵat» qaǵıdasy negízínde jáne patsıentterdíń ómírín saqtaı otyryp, Balqash tūrǵyndaryna ınfarkt pen ınsult kezínde shūǵyl joǵary tehnologıyalyq kómek kórsetuge múmkíndík beredí. Ońaltu ortalyǵynyń ashyluy tūrǵylyqty jerí boıynsha erekshe qajettílíkterí bar balalar úshín qalpyna keltíru emín úzdíksíz aludy qamtamasyz etedí.
