Jańa jyl merekesí qarsańynda Almatynda auqymdy merekelík bezendíru jūmystary júrgízíldí, - dep habarlaıdy Aqshamnews.kz.
Qalanyń ortalyq qoǵamdyq keńístíkterímen qatar shalǵaı ornalasqan shaǵynaudandar da qamtylyp, barlyq audanda bírtūtas merekelík atmosfera qalyptasty.
Qala tūrǵyndary men megapolıs qonaqtary jıí baratyn dástúrlí núkteler Abaı alańynda, Astana alańynda, Arbat jayau júrgínshíler aımaǵynda, Panfılov kóshesínde, 28 gvardıyashy-panfılovshylar atyndaǵy sayabaqta, «Almaty Arena» aumaǵynda jáne «Atakent» kórme keshenínde ornalasqan. Atalǵan alańdarda negízgí jańa jyldyq ís-sharalar, kontsertter, jármeńkeler men otbasylyq demalys baǵdarlamalary ótedí.
Bıylǵy jańa jyl mausymynda qalanyń merekelík kartasy keńeıtílíp, 13 jańa lokatsıya kórkemdík bezendíruden óttí. Olardyń qatarynda Saıran kólí, «Gúlder» jáne «Family» sayabaqtary, Gandı men Baıseıítova skverlerí, «Aınabūlaq», «Jasqanat», «Kókjıek» jáne «Qūlager» shaǵynaudandary bar. Būl aumaqtar jaryq keskíndemelerímen, gırlyandalarmen jáne taqyryptyq shaǵyn sáulet nysandarymen bezendírílíp, tūrǵyndarǵa úıíníń mańynda merekelík kóńíl kúı syılap jatyr.
Jańa jyldyq bezendíru jūmystary qalanyń 38 shaqyrym kóshesín, onyń íshínde 12 negízgí dańǵyl men magıstraldardy qamtydy. Almaty halyqaralyq áuejaıynan bastap qalanyń ortalyq kósheleríne deıíngí baǵytta júzdegen jaryq kronshteın men gırlyanda ornatyldy. Atap aıtqanda, Maılın kóshesí, Qūlja tas joly, Shyǵys aınalma avtojoly, ál-Farabı, Dostyq, Abaı jáne Nazarbaev dańǵyldary merekelík jaryqpen kómkeríldí.
Qala boıynsha barlyǵy 21 mūz aıdyny bezendíríldí, 480 shaǵyn sáulet nysany ornatyldy, 2000-nan astam jaryq kronshteın paıdalanyldy, 47 kópír men jerústí júrgínshíler ótkelí kórkemdeldí, sondaı-aq shamamen 2200 aǵash merekelík shamdarmen bezendíríldí. Almatyda 74 jańa jyldyq shyrsha ornatyldy, onyń 30-y memlekettík, al 44-í jeke menshík shyrshalar.
Bıyl jańa jyldyq áshekeılerdíń bír bólígí qalpyna keltírílíp, qaıta qoldanyldy. Atap aıtqanda, 56 shaǵyn sáulet nysany jańartyldy, onyń íshínde 4 jańa jyldyq shyrsha, 45 merekelík aǵash úıshík jáne 7 írí jaryq qūrylymy bar.
Qalalyq keńístíktíń kórkemdík mazmūnyna erekshe nazar audaryldy. Almatynyń ár audanynda ertegí keıípkerleríníń jaryq músínderí, 2026 jyldyń sımvolıkasymen bezendírílgen art-nysandar, qar ūshqyny, syılyq, būǵy jáne jańa jyldyq sharlar píshíníndegí sándík kompozıtsıyalar ornatyldy. Atalǵan keskíndemeler qala tūrǵyndary men turıster úshín tanymal fotoaımaqqa aınaldy.
Jańa jyldyq bezendírudíń mańyzdy elementteríníń bírí - merekelík jármeńke stılínde jasalǵan aǵash úıshíkter. Olar sauda pavılondary, ınteraktıvtí alańdar jáne qalalyq dekor elementterí retínde paıdalanylady.
Merekelík kórkemdeude «Taza Qazaqstan» taqyryptyq shaǵyn sáulet nysandary erekshe oryn alady. Atalǵan nysandar Almaty halyqaralyq áuejaıynda jáne Almaty-2 temírjol vokzalynda ornatylǵan. Olar jańa jyldyq dızaındy ekologıyalyq mazmūnmen úılestíre otyryp, qorshaǵan ortanyń tazalyǵyna qamqorlyq jasau, tabıǵatqa ūqypty qarau jáne ekologıyalyq jauapkershílík mádenıetín qalyptastyru ıdeyasyn bíldíredí.
Merekelík kezeńde būl nysandar qalanyń negízgí kólík toraptaryn bezendíríp qana qoımaı, qala qonaqtary men tūrǵyndaryn damu men Qazaqstannyń ekologıyalyq bolashaǵyna nazar audaruǵa yqpal etedí.