Qazaqstandyqtar arasynda "depressıa kezinde eńbekke jaramsyzdyq paraǵyn rásimdeýge bola ma?" degen suraq talqylanyp jatyr. Bul máselege qatysty Densaýlyq saqtaý mınıstrligi túsinikteme berdi, dep habarlaıdy Aqshamnews.kz tilshisi.
Densaýmın jaýaby
Mınıstrlik ókilderi eń aldymen «depressıa» dıagnozyn psıhıatr ǵana qoıatynyn eske saldy. Al bastapqy belgilerdi jalpy praktıka dárigeri nemese psıholog anyqtaýy múmkin.
Vedomstvonyń málimetinshe, eger dáriger pasıenttiń jaǵdaıy ýaqytsha jumysqa qabilettiligin shekteıdi dep eseptese, jeńil dárejedegi depressıa kezinde eńbekke jaramsyzdyq paraǵy ashylýy múmkin.
Al orta jáne aýyr dárejeli depressıa kezinde naýqas stasıonarlyq em alýy tıis, bul – mınıstrlik standarttarynda kórsetilgen talap.
Depressıany qalaı anyqtaıdy?
Budan buryn psıhıatr Nabı Esımov depressıa dıagnozyn qoıý úshin úsh negizgi krıterıı bar ekenin túsindirgen:
-
kóńil-kúıdiń eki aptadan kem emes ýaqyt boıy turaqty tómen bolýy;
-
oılaý belsendiliginiń tómendeýi – zeıinniń nasharlaýy, qarapaıym esepteýlerdi qıyn oryndaý;
-
qozǵalys belsendiliginiń tómendeýi – jumysqa barýǵa qınalý, tósekten turýǵa qulyqsyzdyq.
Mınıstrlik deregi boıynsha, depressıa – dáriger baqylaýyn qajet etetin medısınalyq jaǵdaı, al eńbekke jaramsyzdyq paraǵy naqty klınıkalyq jaǵdaıǵa baılanysty beriledi.