Eńbek kúni men «Jumysshy mamandyqtar jylyna» oraı Almaty qalasynyń eńbek mobıldiligi ortalyǵy jalpyqalalyq bos jumys oryndary jármeńkesin ótkizdi.
İs-shara Arbat alańynda merekelik atmosferada ótip, ondaǵan iri kompanıany, memlekettik uıymdardy, kásiporyndardy jáne jumyssyz azamattardy biriktirdi. Jumys berýshiler men úmitkerler arasynda tikeleı suhbattasý bolyp, bos jumys oryndary týraly ózekti aqparat alýǵa múmkindik berildi.
Almaty – eldegi eń qarqyndy damyp kele jatqan ári jastar kóp shoǵyrlanǵan qalalardyń biri. Statısıkaǵa sáıkes, munda 700 myńnan astam jas azamat turady, olardyń shamamen, 400 myńy – 14 pen 29 jas aralyǵynda. Solardyń ishinde 12,5 myńnan astamy jumyssyz bolsa, NEET sanatyndaǵy jastardyń sany – 40 myńǵa jýyq. Osyǵan baılanysty úmitkerlerge 300-den astam bos jumys orny usynylyp, túrli salalar boıynsha 2000- nan asa qyzmet orny qamtyldy. Olardyń ishinde óndiris, ónerkásip, qurylys, kólik pen logıstıka, saýda jáne qyzmet kórsetý, densaýlyq saqtaý, bilim berý, energetıka, aqparattyq tehnologıalar, mádenıet jáne qoǵamdyq tamaqtaný salalary bar.
– Biz «EFKO» iri óndiristik kompanıasyna qoǵammen baılanys jónindegi jáne satý jónindegi menedjerlerdi, naryqty taldaý bóliminiń mamanyn, operatorlardy, hımıalyq taldaý zerthanashylary jáne júk tıeýshilerdi jumysqa shaqyramyz, – dep atap ótti personaldy irikteý jónindegi menedjer Karına Plotnıkova.
Qazaqstanda bótelkedegi sý men sýsyndar óndirýge mamandanǵan basqa kompanıaǵa orta bilimmen «ekspedıtor» bolyp jumysqa turýǵa bolady. Tek qana «V», «S» sanatyndaǵy kólik quraldaryn basqarý kýáliginiń bolýy, júrgizýshi mamandyǵy boıynsha keminde bir jyldyq eńbek ótili, jergilikti jerdi jaqsy bilý jáne qalany meńgerý qajet. Sonymen qatar, jıyn barysynda qoldan jasalǵan buıymdar jármeńkesi de ótkizildi. Onda kádesyı qorapshalary, gıpsten jasalǵan buıymdar, taqıa, shamdar jáne taǵy basqa kóptegen ónim satyldy.