Jylda bir keletin eńbek demalysy bitip, jumys ornyna oralǵan sátte kópshiligi birden iske kirisip kete almaı júredi.
Mundaı jaıttar kópshilikke jaqsy tanys.Osy jaǵdaıdan shyǵý úshin ne isteý kerek?
Bul týraly Almaty-akshamy.kz Elorda.info saıtynyń júrgizgen zertteýin usynady.
Geshtalt-terapevt Elmıra Shanıevanyń aıtýynsha, eńbek demalysynan oralǵandarǵa qandaı da bir keńes bermes buryn, ol adamnyń qansha ýaqyt, qashan, qaıda, qalaı jáne qandaı jaǵdaıda tynyqqany jaıly málimetterge mán berý kerek. Bireý 3 kún, bireý 1 apta, al bireý 30 kún demalýy múmkin. Áldekim úıinde, áldekim shetelde eńbek demalysyn ótkizgen bolar. Demalysta adam tolyqqandy óz resýrsyn qalpyna keltire aldy ma? Bireýler bul ýaqytta syrqattanyp qalǵan shyǵar, múmkin saıahatqa bala-shaǵasymen baryp sharshap ketti me? Álde adamdy qur demalys jalyqtyrdy ma nemese úı ishindegi aıqaý-shý qajytty ma? Munyń barlyǵy – jekelegen ózgeshelikter, sáıkesinshe keńester de ártúrli bolmaq.
«Menińshe, eń basty nazar aýdarý kerek nárse: klımat aýystyrsańyz, orta ózgerse, ol jaqtan kelgen soń, mindetti túrde, beıimdelýge ýaqyt kerek. Mysaly, men keshe ǵana Túrkıadan keldim. Maǵan ádettegi jumys aǵynyna ilesip ketý úshin ýaqyt kerek. Siz de ózińizden surańyz: «Maǵan demalys kerek pe, álde jumysqa shyǵýym kerek pe?» dep. Eger sharshap-shaldyǵyp, óz-ózińizge kele almaı tursańyz, múmkindigińiz bolsa, 1-2 kún tynyǵyp alyńyz. Ondaı múmkindik bolmasa, sál-pál kóńilińiz qulazyp, ashýlanyp alǵan soń, úlkendershe sheshim qabyldańyz. Óıtkeni úlken adam aldynda turǵan mindetti, ony oryndamasa ne bolatynyn túsinedi ǵoı», - dedi geshtalt-terapevt Elmıra Shanıeva.
Al pedagog-psıholog Shynar Tókenovanyń aıtýynsha, keıbir psıhologıalyq ádister adamnyń oıyn jaqsy arnaǵa buryp, demalystan keıingi kúızelisti azaıtyp, qyzmet aǵynyna ilesip ketýine kómektesetinin aıtty. Ol úshin eńbek demalysynan jumysqa oralǵan qyzmetker myna keńesterdi oryndasa bolady:
1. Jumys ústeline nemese kabınetine ózgerister jasaý
2. Ózi unatyp, tańdap alǵan jańa kıim kıý
3. Óziniń myqty tustaryn jazý
4. Kóbirek ortamen aralasý
5. Tapsyrmalardy ońaı-kúrdeliligine qaraı bólip shyǵý.