Brazılıa – álem chempıonatyn bes ret jeńip alǵan ári osy jetistigi jaǵynan bárinen ozyq qurama. Fýtbol talanttaryna óte baı el bıyl da basty favorıt bolyp sanalady.
Quramynda ylǵı yǵaı men syǵaılar. Ásirese, shabýylshylarynan fýtbol jankúıerleri ǵana emes, en dalada jaıylyp júrgen at úrkedi. Eger óz múmkindikterin tolyǵymen paıdalanyp, júzege asyrsa, olar úshin chempıon bolý sonshalyqty qıyn emes.
Eń bastysy, bas bapkeri Tıte qorǵanysqa erekshe nazar aýdaryp júr. Sonyń arqasynda, Brazılıa quramasy keıingi oıyndarda óz qaqpasyna gol jiberip alyp, jaza basýdy kúrt tómendetti. 39 jastaǵy Danı Alvesten basqasy Eýropada oınaıdy. Segiz qorǵaýshysynyń úsheýi «Iýventýs» klýbynyń namysyn jyrtady.
Áıtse de, qorǵanysynyń topsasy óte berik dep aıta almaımyz. Mılıtao, Bremer, Markınostan basqalary 30-dan asyp ketken. Qorǵaýshylary da atoılap alǵa shaýyp, gol salǵandy teris kórmeıdi. Sodan soń... oıyn erejesin buzyp, eskertý alatyndaryn da joqqa shyǵara almaımyz.
Qaqpashysy Alıson dál qazir sporttyq babynda ma?! Bul rette, «Lıverpýl» klýbynyń qazirgi jaǵdaıy asa máz emes. Jartylaı qorǵanysy men shabýylynyń arajigi alshaqtaý sekildi. Bul turǵyda Kazemıro, Fred, Fabıno jáne Paketa tórteýiniń bireýi «jyrtyqqa» jamaý bola ala ma?
Eger Neımar «qara jumysty» óz moınyna alyp, jartylaı qorǵaýshylary men shabýylshylarynyń arasyna uıytqy bola alsa, áńgime bólek. Vınısıýs pen Antonı de bar. Juldyzdarynyń bári de jeke bastarynyń múddesin emes, komandalyq jetistikke kóńil bólse, «pentakampeondar» úshin alynbaıtyn qamal joq.
Al shabýyly dersiz? Shabýyly – quıyn! Ári Neımardan basqasy 21, 22 jáne 25 jastaǵy – jer tarpyǵan dúldúlder. Baıaǵydaı, «eń jaqsy qorǵanys – shabýyl» dep, taıly-taıaǵymen alǵa qaraı lap qoısa da bolar edi. Biraq Tıteniń tyldy oılaıtyn saqtyǵy durys sıaqty. Shópti uzaq shapsań, shalǵynyń ózi tasqa tıse, júzi muqalyp qalmaı ma?
«Uly sózde uıat joq», deıdi qazekem. Bul eldiń talanttaryn «qurtatyn» eń keleńsiz qylyqtary men minderi – olardyń oıyn-saýyqqa áýestikteri men qyzqumarlyqtary. Áıgili Brazılıa Karnavaldarynda shalqyp ósken, Kopakabana jaǵajaılarynda ózderin erkin ustaıtyn fýtbolshylary da sulý kórse, kózderi ottaı janady.
Al ondaı sulý bıkeshter kózderimen tanadaı «súzetin» bolsa, onda olar «bas jipterin» álem chempıonatynda úze beretin shyǵar-aý. Ronaldo da, Rıvaldo da, Adrıano da, tipti Ronaldıno da osyndaı aqjarqyn, aqkóńil minezderiniń kesirinen Messı men Krıshtıaný Ronaldýdan qalyp qoıdy. Olar tipti «osy Leo men KR múlde qyzdarǵa barmaıtyn shyǵar» dep, tańdanatyn da sekildi ǵoı...
Tipti, sonaý 60-70 jyldary, sol aıaǵy oń aıaǵynan 6 sm qysqa Garrınchanyń ózinde birneshe áıelden kemi 14 balasy bolǵan. Norvegıadaǵysy ol, óz aldyna – bir shejire. Eden jýýǵa kelgen qyzmetker qyzdy ustap alyp... 15 mınýttyń ishinde bar sharýasyn bitirgen. Al ol kámeletke tolmaǵan, jetim qyz bolyp shyǵyp, arty sotqa deıin ulasyp, halyqaralyq deńgeıdegi shý bolǵan...
Qazaq «Jaıaý Musa» romanyndaǵydaı, kesh batsa, «aqsúıek» oınap, buta-jyńǵyldyń túbine aýnaı ketetindigin qoıyp, tipti ondaıdy múlde umytqan. Al brazılıalyqtar qumdaýyt jaǵajaıǵa aýnaı ketetindikterin qoımaǵan sıaqty ǵoı. Tss... sulý qyzdardy olarǵa qarsy qoldanýǵa da bolatyn shyǵar, á?..
Qorytyndy: Brazılıa quramasynyń áleýeti men múmkindigi ózgelerimen salystyrǵanda, áldeqaıda joǵary. Áıtse de, men olar chempıon bolady degenge tolyq senbeımin. Temirdeı tártipke noqtalanǵan qurama olardy san soqtyryp ketýi ábden múmkin.