Qazaqstanda 1,5 myńǵa jýyq dárilik ósimdik ósedi.
Bul týraly QR Ekologıa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti tóraǵasynyń orynbasary Erlan Qutpanbaev Ortalyq komýnıkasıalar qyzmetinde ótken brıfıńte aıtty, dep habarlaıdy Almaty-akshamy.kz.
«Qazaqstannyń ósimdikter dúnıesi aǵash-buta jáne shóp ósimdikteriniń 6 myńnan astam túrin quraıdy. Onyń ishinde 1,5 myńǵa jýyq túri dárilik ósimdikter (onyń ishinde 230 túri resmı medısınada tanylǵan), 390 túri Qazaqstan Respýblıkasynyń Qyzyl kitabyna engizilgen, 110 túri relıkti ósimdikter, sondaı-aq 700 endemıkalyq ósimdik túrleri», - dedi ol.
Qutpanbaevtyń aıtýynsha, Qazaqstanda eksporttalatyn dárilik ósimdikteriniń tizimine 14 túri kiredi – bul mıa, ferýla, sıstanhe, Túrkistan sabyn tamyry jáne basqalary.
«Kedendik statısıka derekteri boıynsha qazaqstandyq mıa tamyryn ótkizýdiń negizgi naryqtary Qytaı, Túrkıa jáne AQSH bolyp tabylady. Mysaly, Qytaıǵa 2018 jyldan bastap 2022 jylǵa deıin 40 myń tonna mıa tamyry eksporttaldy. Qaraýsyz qoldanylýyna baılanysty dárilik ósimdikterdiń shıkizat qory taýsylady. Dárilik ósimdikterdi baqylaýsyz jınaý kóleminiń ósýine syrtqy naryqtardaǵy suranystyń artýy yqpal etedi», - dedi Erlan Qutpanbaev.