HeadHunter onlaın platformasy Qazaqstandaǵy vahtalyq ádispen jumystyń 2022 jylǵy qorytyndysyn shyǵardy.
2022 jyly jalpy el boıynsha búkil bos jumys oryndarynyń shamamen 4% nemese 20 myńnan astamy vahtalyq jumys boldy.
Vahtada isteıtin qyzmetkerlerge eń úlken suranys Atyraý oblysynda tirkeldi. Odan keıin Qaraǵandy (12%) jáne Almaty (7%) tur, dep habarlaıdy Almaty-akshamy.kz Elorda.info saıtyna silteme jasap.
Vahtalyq jumys izdegender ishinde eń belsendisi Astanada – 27%. Jumys izdeýden Almaty, Aqtóbe jáne Aqtaý vahtashylary da qalyspaıdy – túıindemeniń 7-12% osy qalalarǵa tıesili.
Vahta qyzmetkerlerine eń úlken suranys myna salalarda:
- qurylys, paıdalanýǵa berý, jobalaý;
- óndirýshi sala;
- metalýrgıa, metal óńdeý.
Alaıda, basqa mamandyq ókilderine de jumys kóp, olar – aspazdar, kúzetshiler, kútýshiler, baǵdarlamashylar, dárigerler, tipti satýshylarǵa da vahtalyq usynystar bar.
2022 jyly vahta jumysshysyna orta eseppen 350 myń teńge jalaqy usynyldy, bul – el boıynsha ortasha kórsetkishten joǵary.
«Eń qymbat» vahta jumysynyń reıtıńin Atyraý munaı-gaz salasyndaǵy jobalaý ınjeneri bastap tur – oǵan kompanıa 1 600 000 teńgeden asa eńbekaqy tóleýge daıyn.
Ekinshi orynda – Teńiz kentindegi kásiporynda EQ, QT jáne QOQ boıynsha menedjer (aılyq 1 500 000 teńgeden joǵary).
Úshinshisi – Qaraǵandyda tehnologıalyq jabdyqtar men qubyrlardy dánekerleýshi, jalaqysy 1 300 000 teńgeden bastalady.