Qazaqstanda alkogólsiz sýsyndar men shyryndardyń baǵasy kóteriledi
Óndirýshiler asosıasıasy aldaǵy ýaqytta baǵany qaıta qaramaqshy. Olar óz ónimderiniń qunyn qanttyń qymbattaýyna baılanysty ósirmekshi, dep habarlaıdy Almaty-akshamy.kz Elorda.info-ǵa silteme jasap.
"Óndirýshiler óz ónimderiniń baǵasyn ustap turýǵa tyrysýda. Alaıda bul uzaqqa sozyla almaıdy, sebebi negizgi ıngredıent – qanttyń baǵasy ósip jatyr. Sáıkesinshe, óndirýshiler de taýarlaryn qymbattatýǵa májbúr. Shamamen 7-20% aralyǵynda dep oılaımyn. Qazir óndirýshilerdiń kóp bóligi shyǵyndy ońtaılandyrý joldaryn izdep jatyr. Sonymen qatar jumysshylar sanyn qysqartý da bar", – dedi Alkogólsiz ishimdik óndirýshileri asosıasıasynyń prezıdenti Álıa Mamytbaeva.
Qant sońǵy úsh aıda aıtarlyqtaı qymbattaı túsken. EnergyProm sarapshylarynyń málimetinshe, tek naýryz aıynda baǵa 33%-ǵa, bir jylda eki esege ósken.
Kóktemniń basynda eń qymbat qant Nur-Sultanda satylǵan. Munda tutynýshylar bir kelisi úshin 450 teńge tólegen. Keıingi orynǵa Almaty men Qostanaı ornalasty. Al eń arzan qant Taraz qalasynda boldy.
Qazir Almatydaǵy azyq-túlik dúkenderinde qant 500-650 teńgege satylyp jatyr. Shaqpaq qanttyń bir qaptamasynyń quny 1 000 teńgege deıin jetedi. Sondaı-aq elde qant óndirisi de qysqarǵan. Otandyq zaýyttar qańtar men naýryz aılarynyń aralyǵynda 51 myń tonna qant óndirgen. Bul ótken jylǵymen salystyrǵanda 20%-ǵa az.