Qazaqstandyq tutynýshylarǵa da lımıt qoıyldy
Búginnen bastap sheteldik kólikterge dızel otyny 450 teńgeden satylady. Sondaı-aq qazaqstandyq tutynýshylarǵa da lımıt qoıyldy. Iaǵnı, jeńil kólikke táýligine 100 lıtr dızel 230-260 teńgeden satylady. Eger odan kóp alatyn bolsańyz, eki ese baǵaǵa satyp alýyńyzǵa týra keledi. Energetıka mınıstrligi arnaıy buıryqqa qol qoıdy, dep habarlaıdy Almaty-akshamy.kz Almaty.tv-ge silteme jasap.
Qazaqstannyń dızeli arzan bolǵan soń ony TMD elderi júk kólik júrgizýshileri tonnalap alyp ketip jatyr degen qazaqstandyq tutynýshylar jańa buıryqtyń shyqqany durys boldy deıdi. Osy ýaqytqa deıin ózge eldiń kólikteri baktaryn toltyryp jatqanda, kasırge jalynyp turatynbyz deıdi otandyq tizginshiler.
«Joq deıdi. Eń bolmasa 50 lıtr berseńizshi jetetin jerimizge jetip alaıyq deseń. Joq deıdi. Satpaıdy. Qyrǵyz ben sol jerge ózbektiń kóligi keletin bolsa, olarǵa satady», – dedi júk kóliginiń júrgizýshisi Asylhan Raıymbekov.
«Dızel joq. Janarmaı beketinde joq. Joq bop jatyr», – dedi júk kóliginiń júrgizýshisi Rıshat Berikbol Ráshat.
«Energetıka mınıstrliginiń munaı ónimderine shekti baǵalardy belgileý týraly buıryǵynda bylaı delingen. Eger tizginshi Qazaqstan azamaty bolsa, sonymen qatar ol bizdiń elde berilgen júrgizýshi kýáligin kórsetse, óńirine qaraı bir lıtr dızeldi 230-260 teńgeden satyp ala alady. Biraq ol kezde otynnyń lımıti 100 lıtr. Al kóligi Qazaqstanda tirkelgeni týraly kýálikti kórsetken júk mashınasyna lımıt táýligine 300 lıtr bolmaq eken. Endi eń qyzyǵy, eger belgilengen lımıtten joǵary dızel alatyn bolsańyz onda lıtri 450 teńgeden saýdalanady. Ásirese, shetelden kelip, tonnalap dızel áketetin kólikterge toqtaý salý úshin jasalǵan», - deıdi Energetıka mınıstrliginiń ókili.
«Qazaqstan Respýblıkasynyń Energetıka mınıstrligi múddeli taraptarmen birlesip, avtojanarmaı quıý stansıalarynda satylatyn dızel otynynyń táýliktik kólemin odan ary qadaǵalaý úshin aqparattyq júıeni anyqtaýǵa baılanysty máselelerdi pysyqtap jatyr. Jaqyn arada avtojanarmaı quıý stansıalary ókilderimen birlesip, júıelerdi testileý ótkiziletin bolady, – dedi QR Energetıka mınıstrligi munaı tasymaldaý jáne óńdeý departamentiniń basqarma basshysy Talǵat Maqýov.
Aıta ketsek, Argus Kaspıı naryǵy servısiniń derekterine sáıkes 1 tamyzdaǵy jaǵdaı boıynsha EEO múshe elderde bir lıtr dızel Armenıada - 758 teńge, Reseı men Belorsýlte - 446 teńge, Qyrǵyzstanda - 412 teńge. Endi atalǵan elderden kelip, bizdiń arzan dızeldi alǵysy keletinderge baǵa sol memleket baǵasymen teńesti.