Densaýlyq saqtaý mınıstrliginde «Qazaqstan halqyna» qoǵamdyq qorynyń Basqarma tóraǵasy Bolat Jámishevpen jáne «University Medical Center» KQ basqarma basshysy Iýrıı Pámen orfandyq aýrýlary bar balalarǵa medısınalyq kómekti jetildirý máseleleri boıynsha kezdesý ótti.
Keńestiń sheńberinde sırek kezdesetin aýrýlary bar balalarǵa medısınalyq kómek kórsetýdi jaqsartýdyń ózekti máseleleri talqylandy, dep habarlaıdy Almaty-akshamy.kz.
Mınıstrlik sońǵy 3 jyldyń ishinde densaýlyq saqtaý salasyndaǵy «Qazaqstan halqyna» qoǵamdyq qorymen belsendi yntymaqtastyqta boldy jáne orfandyq, onkologıalyq, onkogematologıalyq aýrýlary bar azamattardy qymbat dárilik zattarmen qamtamasyz etý, onkologıalyq qyzmetti, balalar neırohırýrgıalyq qyzmetin, transplantattaýdy, ınfraqurylymdy jáne ońaltý ortalyqtaryn damytý jáne t. b. boıynsha 12 joba men baǵdarlamany birlesip iske asyrýda.
Densaýlyq saqtaý mınıstri Aqmaral Álnazarova «Qazaqstan halqyna» qoǵamdyq qorynyń basshysyna ómirlik mańyzdy jobalardy iske asyrýǵa kómekteskeni úshin alǵys aıtyp, yntymaqtastyqty odan ári damytýdyń negizgi baǵyttaryn belgiledi. Ol Pedıatrıa jáne balalar hırýrgıasy ǵylymı ortalyǵymen jáne «Aqsaı» ýnıversıtettik balalar klınıkasymen birlesip, «University Medical Center»KQ bazasynda orfandyq aýrýlary bar balalardy emdeýge biryńǵaı keshendi tásildi qalyptastyrýdyń mańyzdylyǵyn atap ótti.
Kezdesýdiń qorytyndysy boıynsha Qazaqstanda qymbat turatyn medısınalyq qyzmetter men naýqastardyń osy sanaty úshin dári-dármekpen qamtamasyz etýdiń qoljetimdiligin arttyrýǵa múmkindik beretin orfandyq ortalyq qurý týraly sheshim qabyldandy.