Qazaqstanda maımyl sheshegin dıagnostıkalaýdyń ádistemesi ázirlenýde.
QR Densaýlyq saqtaý mınıstri Ajar Ǵınıat Ortalyq komýnıkasıalar qyzmetinde osyndaı málimet aıtty, dep habarlaıdy Almaty-akshamy.kz QazAqparatqa silteme jasap.
«Maımyl sheshegi boıynsha 89 elde 25 myńnan astam jaǵdaı tirkelgen. Aýrý atalǵan elderde kóbinese jeńil túrde ótip jatyr. Mysaly, búgingi aqparatty qarasaq, 7 elde 8 ólim jaǵdaıy bolǵan, ıaǵnı aýrý keń tarap jatqan jerlerde - bir elde bir-bir qaıǵyly jaǵdaı bolǵan», - dedi mınıstr.
Aıtýynsha, qazir mınıstrlik mamandary Dúnıejúzilik densaýlyq saqtaý uıymynan kelip jatqan árbir aqparatpen jumys istep otyr.
«Uıymnyń keńesi - maımyl sheshegine qarsy arnaıy ekpe júrgizýdiń qajeti joq. Sondyqtan, atalǵan uıym tarapynan qandaı da bir nusqaý bolsa, sony oryndaýǵa tyrysamyz. Al ózimiz osy aýrýǵa uqsas sımptomdary bar naýqastarǵa monıtorıń júrgizip jatyrmyz. Sonymen birge, atalǵan aýrýdyń dıagnozyn qoıý úshin dıagnostıkýmdar alyp qoımaqpyz. Ózimizdiń qyzmetkerlerdi ázirlep, oqytyp, osy aýrýdy emdeýge nusqaý bolatyn jáne dıagnostıka qoıýdyń ádistemesin belgileıtin hattama ázirlenedi. Bizdiń úlken mamandarymyz Dúnıejúzilik densaýlyq saqtaý uıymynyń ókilderimen birge osy baǵytta jumys istep jatyr»,- dedi Ajar Ǵınıat.