15 qyrkúıekte Qazaqstanda alǵashqy medısınalyq-sanıtarlyq kómek uıymyna erkin tirkelý naýqany bastaldy.
Bul naýqan qarasha aıynyń ortasyna deıin jalǵasady, dep habarlaıdy Almaty-akshamy.kz Áleýmettik medısınalyq saqtandyrý qorynyń baspasóz qyzmetine silteme jasap.
2022 jyly alǵashqy medısınalyq-sanıtarlyq kómek kórsetetin 626 medısınalyq uıym qormen shart jasasty. Onyń 326-sy (53%) memlekettik mekeme jáne 258-i (47%) jekemenshik. Olardyń tizimin qordyń fms.kz saıtynda, «Klınıkany tańdaý» bóliminen kórýge bolady. Pasıent alǵashqy medısınalyq-sanıtarlyq kómek kórsetetin memlekettik, sonymen qatar jekemenshik uıymǵa tirkele alady. Aldyn ala siz tańdaǵan klınıkada bos ýchaskeler bar-joǵyn naqtylap alǵanyńyz abzal.
Tirkeý naýqany ne úshin qajet?
Atalǵan aksıa elimizde jyl saıyn ótkiziledi. Naýqan kezinde qazaqstandyqtar ózderi tirkeýde turǵan emhananyń jumysyna qanaǵattanbasa, basqa emhanaǵa aýysa alady nemese óz emhanasy ishinde basqa ýchaskelik dárigerdi tańdaýǵa múmkindigi bar.
Alǵashqy medısınalyq-sanıtarlyq kómek uıymyna tirkelgen pasıent ýchaskelik dárigerdiń qabyldaýy, óziniń densaýlyq jaǵdaıyn baqylaý, ambýlatorıalyq dári-dármekpen qamtamasyz etý, skrınıngtik tekserýler, dıagnostıkalyq zerthanalyq jáne aspaptyq zertteýler syndy medısınalyq kómek pen emdeýge jatqyzýǵa joldama alady.
Medısınalyq kómeksiz qalmaýy úshin el azamattary turǵylyqty jeri boıynsha emhanada nemese elektrondyq úkimet veb-portalyndaǵy jeke derekterde (ESQ arqyly avtorızasıalaý) tirkelý mártebesin tekserý qajet.
Aıta keterligi, tirkeý naýqany pasıentke 2023 jyldyń 1 qańtarynan bastap qyzmet kórsetetin klınıkany tańdaýyna múmkindik beredi.
Emhanany tańdaý kezinde neni eskerý qajet?
Emhana tańdaýda basty eskeretin jaıt – ol úıden 15-20 mınýt ýaqytta jaıaý jetetin jerde ornalasqany jón. Barlyq emhanalar aýmaqtyq qaǵıdat boıynsha jumys isteıdi jáne pasıent emhananyń qyzmet kórsetý aýmaǵynda turǵan kezde ǵana úıde medısınalyq kómek kórsetiledi. Bul ýchaskelik dárigerdiń nemese mobıldi brıgadanyń kómegi qajet bolǵan jaǵdaıda onyń jedel jetýine, sondaı-aq, otbasy músheleriniń bir dárigerge qaralýyna múmkindik beredi.
Emhanaǵa qalaı tirkelýge bolady?
Birinshi ádis, bul barlyq azamattarǵa arnalǵan. Elektrondyq úkimettiń veb-portaly arqyly bekitý: www.egov.kz saıtyndaǵy «Densaýlyq saqtaý» bóliminde «Medısınalyq-sanıtarıalyq alǵashqy kómek kórsetetin medısınalyq uıymǵa tirkelý» qyzmetin tańdaý qajet. Ary qaraı elektrondyq ótinishtiń barlyq joldaryn toltyrý qajet. Pasıent týraly málimetterdi emhana memlekettik aqparattyq júıelerden avtomatty túrde alady. Jaýap oń bolǵan jaǵdaıda medısınalyq uıymǵa tirkelgenińiz týraly habarlama beriledi.
Ekinshi ádis bul, halyqtyń jekelegen sanattaryna arnalǵan. Olar emhanaǵa jeke basyn kýálandyratyn qujatpen tikeleı júgine alady. Atap aıtar bolsaq, olar zeınetkerler, múgedekter, qamqorshylar taǵaıyndalǵan zań boıynsha bala kezinen múgedekter, qorǵanshylar nemese qamqorshylar, patronattyq tárbıeshiler, kolonıada jazasyn óteýshiler, stýdentter, merzimdi qyzmet áskerı qyzmetshileri, shet memleketterde týǵan balalar, senimhat boıynsha bekitýdi rásimdeıtinder.
Tirkelý naýqanyna barlyǵy qatysýy kerek pe?
Emhanany erkin tańdaý quqyǵyn paıdalanbaǵan azamattar buryn ózi qaralǵan alǵashqy medısınalyq-sanıtarıalyq kómek uıymynda tirkelgen kúıi qalady.
Eger medısınalyq kómek kórsetý sapasyna qatysty suraqtaryńyz bolsa, siz olardy óz emhanańyzdaǵy Pasıentterdi qoldaý qyzmetine qoıa alasyz. Eger jaǵdaıdy sol jerde sheshý múmkin bolmasa, onda Áleýmettik medısınalyq saqtandyrý qoryna yńǵaıly baılanys arnalary arqyly júginýge bolady.
Saqtandyrý mártebesin tekserý jáne júrgizilgen tólemder týraly egov.kz QR elektrondyq úkimeti saıtynyń «Densaýlyq saqtaý» bóliminde «Medısınalyq qyzmetter týraly jáne MÁMS-ke aýdarylǵan somalar týraly aqparat» memlekettik qyzmeti arqyly bilýge bolady.