Elimizde dárigerlerdiń kásiptik jaýapkershiligine qatysty mindetti saqtandyrý júıesi engiziledi. Bul týraly Májiliste keıbir zańnamalyq aktilerge densaýlyq saqtaý máseleleri boıynsha ózgerister engizý týraly zań jobasyn tanystyrý kezinde Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz QazAqparat-qa silteme jasap.
«Medısına qyzmetkerleriniń praktıkalyq qyzmeti qoǵamnyń ıgiligi úshin únemi qaýipke ushyraıtyn mamandyqtarǵa jatady, ıaǵnı kúrdeli ári jaýapty mamandyq. Álemdegi ozyq tájirıbeni qaraı otyryp, medısına qyzmetkerleriniń kásiptik jaýapkershiligi boıynsha mindetti saqtandyrý júıesin kezeń-kezeńmen engizý josparlanyp otyr. Mundaı tásil medısınalyq kómektiń sapasyn arttyrýǵa múmkindik beredi jáne halyqaralyq arenada Qazaqstannyń densaýlyq saqtaý salasy reıtıńisine de áser etedi», - dedi A. Ǵınıat.
Onyń aıtýynsha, «Halyq densaýlyǵy jáne densaýlyq saqtaý júıesi týraly» QR Kodeksiniń 270-babynda medısınalyq kómek kórsetý kezinde pasıenttiń ómirine nemese densaýlyǵyna zıan keltirilgen jaǵdaıda medısına qyzmetkerleriniń kásiptik jaýapkershiligin saqtandyrý quqyǵy zańnamalyq túrde bekitilgen.
«Ondaı norma bar, al zań jobasy osy baptyń iske asyrý joldaryn bekitedi», - dedi mınıstr.
Osy oraıda vedomstvo basshysy zań jobasy medısına qyzmetkerleriniń mártebesin arttyrýǵa, naýqastardyń quqyqtaryn qorǵaýǵa jáne medısınalyq kómektiń sapasyn arttyrýǵa baǵyttalyp otyrǵanyn aıtty.
«Zań jobasyn ázirleý kezinde halyqaralyq tájirıbeler zertteldi. Máselen, Anglıada medısınalyq mekemeniń ákimshiligi medısınalyq qatelik jibergen medısına qyzmetkeriniń tıisti jumysyn qamtamasyz etpegeni úshin azamattyq jaýapkershilikke tartylýy múmkin. Izraılde medısına qyzmetkeri qyzmetin júzege asyrǵan mekeme nemese uıym tek azamattyq-quqyqtyq jaýapqa tartylady, olarda qylmystyq is eskerilmegen. Al AQSH-ta medısınalyq mekememen birge saqtandyrý kompanıalary da jaýapty bolady. Kanadalyq júıede qyzmetin teris paıdalanǵan dárigerlerdi provınsıalyq lısenzıalaý organy jazalaıdy. Fınlándıada medısınalyq kómek kórsetýmen aınalysatyn barlyq aýrýhanalar men kompanıalar saqtandyrylýy tıis. Medısına salasynyń qyzmetkerlerine jeke saqtandyrý sharttaryn bekitýdiń jáne kompanıalarǵa saqtandyrý jarnalaryn tóleýdiń qajeti joq. Bul saladaǵy oqıǵalardy pasıentterdi saqtandyrý ortalyǵy qarastyrady, medısınalyq personal onymen aınalyspaıdy», - dedi A. Ǵınıat.
Onyń sózine qaraǵanda, Reseıde qylmystyq zańda atalǵan qylmystar jáne jalpy medısınalyq qylmystar úshin arnaıy norma joq. Adamǵa qarsy qylmystar týraly taraýda mamannyń óziniń kásiptik mindetterin tıisinshe oryndamaýy saldarynan jasalǵan is-áreket úshin jaýapkershilik kózdelgen.