16 mamyrda eldiń barlyq óńirlerinde Respýblıkalyq reprodýktıvtik densaýlyq aptalyǵy sheńberinde halyqtyń adam papıllomasy vırýsy, onyń saldary jáne profılaktıkanyń múmkindikteri týraly aqparattylyǵyn arttyrýǵa baǵyttalǵan is-sharalar ótkizilýde, dep habarlaıdy aqshamnews.kz
Qazaqstan Respýblıkasy Densaýlyq saqtaý mınıstrliginiń málimetinshe, 2025 jylǵy mamyr aıyndaǵy jaǵdaı boıynsha 11–13 jas aralyǵyndaǵy 138 469 qyz bala APV-ǵa qarsy vaksınanyń alǵashqy dozasyn, al 44 956 qyz bala ekinshi dozasyn alǵan.
Jatyr moıny obyry (JMO) áıelderdiń arasynda keń taralǵan onkologıalyq aýrýlardyń biri bolyp qalyp otyr. Jyl saıyn álemde osy dıagnozdan shamamen 300 myń áıel kóz jumady. Qazaqstanda jyl saıyn JMO-nyń shamamen 2 myń jańa jaǵdaıy tirkeledi.
Jatyr moıny obyrynyń damýynyń negizgi sebebi — joǵary onkogendik qaýipti adam papıllomasy vırýsynyń 16 jáne 18-tıpteri. Sondyqtan ýaqytyly profılaktıka, ásirese vaksınasıalaý, asa mańyzdy.
Vaksına turaqty ımýnıtet qalyptastyryp, bolashaqta aýrýdyń damýynyń aldyn alýǵa múmkindik beredi.
APV-ǵa qarsy ulttyq vaksınasıalaý baǵdarlamasy 2024 jylǵy 1 qyrkúıekte bastalyp, josparly túrde júrgizilýde. Baǵdarlama 11–13 jas aralyǵyndaǵy qyzdardy qamtıdy jáne halyqaralyq standarttar men usynymdardyń negizinde iske asyrylýda.
Qazaqstan onkologıalyq aýrýlardy tómendetý jáne áıelder densaýlyǵyn saqtaý maqsatynda bul praktıkany engizgen 135 eldiń biri boldy.