Bıylǵy 1 shildedegi málimetke sáıkes, elimizde kópbalaly analarǵa beriletin "Altyn alqa" jáne "Kúmis alqa" marapattarynyń ıegerleri, sondaı-aq, burynǵy "Batyr ana" jáne "Ana dańqy" ordenderiniń ıegerlerine taǵaıyndalatyn járdemaqyny 242 495 áıel alyp otyr. Aqshamnews.kz tilshisi ár óńirde qansha kópbalaly ana baryn anyqtady.
Keıingi bes jylda Respýblıka boıynsha kópbalaly ana sany artqan.
- 2021 jyly 229 451 ana;
- 2022 jyly 229 193 ana;
- 2023 jyly 233 759 ana;
- 2024 jyly 238 532 ana;
- 2025 jyly 242 495 ana járdemaqy alǵan.
Aımaq boıynsha bólinisi qandaı?
Eńbek jáne halyqty áleýmettik qorǵaý mınıstrliginiń dereginshe, 2025 jylǵy 1 shildege deıin "Altyn alqa", "Kúmis alqa" alqalarymen nagradtalǵan nemese buryn "Batyr Ana" ataǵyn alǵan, I jáne II dárejeli "Ana dańqy" ordenderimen marapattalǵan kópbalaly analarǵa tabysyna qaramastan aı saıynǵy memlekettik járdemaqy tólenedi.
Járdemaqy mólsheri qandaı?
2025 jylǵy 1 qańtardan bastap bul járdemaqynyń mólsheri "Kúmis alqa" ıegerleri úshin 25 165 teńge (6,4 AEK), al "Altyn alqa", "Batyr Ana" jáne "Ana dańqy" ordenderiniń ıegerleri úshin 29 097 teńge (7,4 AEK) bolyp belgilendi.
Keıingi jyldary respýblıka boıynsha járdemaqymen qamtylǵan nagradtalǵan analardyń sany turaqty túrde artyp keledi. Mınıstrliktiń málimetinshe, keıingi bes jylda bul kórsetkish ósý dınamıkasyn saqtap otyr.
Áleýmettik qoldaý sharalary
Búginde nagradtalǵan analarǵa Salyq kodeksine sáıkes birqatar jeńildikqarastyrylǵan. Olardyń qatarynda kólik quraldaryna, turǵyn úı janyndaǵy jer ýchaskelerine, jeke tulǵalardyń múlkine salynatyn salyqtan bosatý bar. Sondaı-aq notarıattyq qyzmetter, tólqujat pen jeke kýálik rásimdeý kezinde memlekettik baj tóleýden bosatylady.
Marapattaý erejeleri
2010 jyldan bastap marapattaý sharttary jeńildetildi: "Altyn alqa" jeti jáne odan da kóp balasy bar analarǵa (buryn 10 jáne odan da kóp), al "Kúmis alqa" alty balanyń analaryna (buryn 8 bala) beriledi.
"Kúmis alqa" alqasymen alty bala týǵan jáne tárbıelegen analar marapattalady. "Altyn alqa" jeti jáne odan da kóp bala týǵan jáne tárbıelegen, Qazaqstan azamattyǵy bar analarǵa, jetinshi bala bir jasqa tolǵannan keıin jáne basqa balalary tiri bolǵan jaǵdaıda tabystalady.
Qujat tapsyrý tártibi
Kópbalaly analardy memlekettik nagradalarǵa usyný týraly ótinishti jergilikti atqarýshy organdar Prezıdent janyndaǵy Memlekettik nagradalar jónindegi komısıaǵa joldaıdy. Ol úshin analar turǵylyqty jeri boıynsha aýdan ákimdigine qajet qujattardy tapsyrýy kerek.