Yntymaqtastyq artýda
AQSH pen Qazaqstan bıologıalyq qaýipsizdik salasyndaǵy yntymaqtastyqty arttyrady, dep habarlaıdy Almaty-akshamy.kz Qazaqtv.com saıtyna silteme jasap.
Qazaqstan men AQSH qaýipsizdik salasyndaǵy yntymaqtastyq deńgeıin arttyrýǵa nıetti. Bul týraly elimizdegi jumysynyń aıaqtalýyna arnalǵan dóńgelek ústel barysynda AQSH-tyń Qazaqstandaǵy elshisi Ýılám Mozer málim etti.
Spıker qos taraptyń basqa da salalarda ózara tıimdi yntymaqtastyqty keńeıtýge múmkindigi mol ekenin aıtty. Mysaly, amerıkalyq fermerler óz tehnologıalarymen bólise alady.
Bul jergilikti aýylsharýashylyq taýarlardy halyqaralyq naryqta básekege qabiletti etedi. Sondaı-aq Ýılám Mozer qazaqstandyq ónimder sheteldik tutynýshylardyń júregin jaýlap alatynyna senimdi.
«Qazaqstanda jasalǵan» taýarlar, ásirese, AQSH-ta suranysqa ıe bolý múmkin», – dedi ol.
«Qazir qazaqstandyq taýarlardy AQSH-ta tabý múmkin emes. Biraq men bul Qazaqstan úshin kerisinshe múmkindik der edim. Ekonomıkanyń osyndaı sektorlaryn damytyp, halyqaralyq naryqta básekege qabiletti taýarlar shyǵarýǵa bolady. Qazaqstanǵa óz artyqshylyqtary bar sektorlardy aıqyndap, taýarlardy tańdaý kerek», - dedi AQSH-tyń Qazaqstandaǵy elshisi Ýılám H. Mozer.